魔性澎湃、又贏一場，雖然爭議性極大……周六晚英超頭場，曼聯喺主場以2:1奇蹟反勝曼城，般奴入嘅第一球究竟有冇越位？冇第一球、又會唔會有3分鐘後福仔嘅第二球？
曼城控球率7成，下半場一出嚟氣勢亦十分強勁，可惜足球就係咁殘酷，拉舒福特實在太「醒目」，第一球齋護波唔掂波博一博、第二球捕靚位，就係咁，福仔世盃後7場都有入波，更連續9戰奧脫福建功，平咗球會紀錄。
曼聯賽前8連勝，更獲荷蘭巨塔韋格賀斯來投，但因為趕唔切註冊，今場未出得，但氣勢堅係近年最強。
前面由安東尼馬迪爾擔正，腳風順到爆嘅拉舒福特、般奴費南迪斯同基斯甸艾歷臣支援，卡斯米路、費特雙防中，至於周中聯賽盃爆冷出局嘅曼城，今仗強陣出擊，夏蘭特、迪布尼復任正選，仲有馬列斯、科頓側擊。
曼城一如以往控球較多，但真正威脅唔算大，夏蘭特冇乜供應，反而曼聯反擊頗有威脅，34分鐘，拉舒福特更避過曼城門將艾達臣起腳，可惜角度太窄，被艾簡治護空門，之後佢單刀，又被艾達臣封阻。
福仔上半場疑似拉傷，下半場繼續頂硬上，但曼城已越踢越好，基亞利殊後備入場只係3分鐘，就接應迪布尼傳中頂入。
正當以為曼城可順利贏波，去到78分鐘，全場比賽嘅轉捩點出現，曼聯靚直線，福仔處於越位位置，然後一路跟住個波跑，但就好醒目咁唔掂波，再讓畀後上嘅般費撞射得手，咁樣究竟計唔計參與進攻？球證嘅答案係：唔計進攻，入球成立！
曼城球員投訴無門，而且疑受事件影響仲未回魂，82分鐘，後備上陣嘅加拿祖傳中，拉舒福特無人看管近射搞掂，連續9仗喺奧脫福建功，最終曼聯反勝2比1，連贏9場。
曼聯目前18戰38分，落後榜首阿仙奴6分、踢多1場，而曼城第2，落後阿仙奴5分、踢多1場。嚟緊曼聯會喺周中對水晶宮，然後下周年初二大戰阿仙奴。
