亞洲球隊喺今屆世界盃大放異彩，南韓、日本已出線16強，即使已出局嘅沙特阿拉伯同伊朗，都曾經贏過波，當中沙特更曾驚天反勝阿根廷；而「亞洲足協」代表澳洲，亦喺被一致睇低下殺入16強，更創造出該國史上最佳分組賽成績。
澳洲喺世界盃歷史上最佳成績係2006年，當年佢哋由名帥希丁克帶領，喺分組賽同巴西、克羅地亞及日本同組，最終以4分出線，入到16強後不敵當屆冠軍意大利，絕對係交足功課。
2006年嘅澳洲，可以話係球星如雲，前鋒維度卡、翼鋒基維爾、中場卡希爾、後衛艾馬頓及普波域治、門將舒華沙，大半隊踢英超，另外亦有外流到意甲、荷甲等，只得3人喺澳職搵食。
不過，近年澳洲球星幾乎已絕跡於主流聯賽，今次26人大軍當中，大部份都係喺澳職打滾，外流中最出名嘅已經係踢緊些路迪嘅阿倫穆爾、以及曾經效力阿仙奴、現於丹超搵食嘅馬菲賴恩，勉強加埋嘅，仲有1月將加盟紐卡素嘅新人王古奧。
點解呢支平平無奇嘅澳洲，分組賽成績可以拍住法國（同得6分）、更勝黃金一代？教練格拉咸阿諾特可能係關鍵因素之一。
阿諾特係2006年澳洲嘅助教，佢比任何教頭對黃金一代，絕對有更深感受。輾轉教過澳職及日職球隊後，阿諾特喺2018年重掌澳洲帥印，兼任埋U23領隊，佢對澳洲球員嘅熟悉程度，好有可能係全世界第一。
阿諾特知道呢班波咩料，踢嘅係最傳統嘅穩守突擊，守將夠件頭、中場則非常爛打，玩高波體力化絕對唔驚你，入波機會未必多，但一吓突擊足以士哥。
要喺世界盃大舞台踢呢家波，專注度要求非常之高，所以阿諾特亦頒令，無論咩情況，國家隊成員都唔可以慶祝、唔可以上社交平台。當然，球員都係人，馬菲賴恩日前就自爆曾經破戒，不過佢亦話冇時間上社交網，對保持專注有好大幫助。
嚟到16強，澳洲將會挑戰阿根廷，佢哋可唔可以複製「沙特奇蹟」、突破國家最佳成績？留待今晚深夜揭盅。
