2022年屢受打擊嘅C朗，嚟到2023年2月，終於威番鋪，尋晚沙特聯賽，佢個人食出大四喜，包辦球隊全部入球，助艾納斯作客4蛋炒艾維達，生涯累積聯賽入球突破500球，總算踢出加盟後嘅代表作。
C朗以自由身加盟艾納斯後，唔計同PSG嘅友賽，踢咗3場正式比賽只入一球12碼，表現的確令人失望。直至尋晚，呢位38歲嘅葡萄牙巨星終於踢番應有水準，一入就入夠4球。
21分鐘，C朗接應直線，喺禁區內左腳攞遠柱開紀錄，收穫個人生涯第500個聯賽入球。完半場前，C朗右路高速壓入禁區再建一功；下半場8分鐘，再操刀極刑得手，之後C朗又有單刀機會，第一次起腳被撲出，不過佢反應夠快，成功補中，率艾納斯大勝4比0。
今場係C朗第11次食出「大四喜」，當中有2次入5球，連續14季單場入3球或以上，生涯累積突破500個聯賽入球，成就非凡，母會士砵亭亦出po恭賀。雖然今場波係作客，不過大部份球迷都同C朗慶祝入波，完場後，C朗更拎個波畀球證簽名，然後先帶走。
C朗賽後受訪，話入波好開心，但最重要係幫球隊重上榜首，之後佢再出po，同支持者一齊慶祝：「好開心入到4球，並喺一場穩固嘅勝仗之中，取得第500個聯賽入球。」
