論西甲招牌球隊，梗係皇馬同巴塞。但識波嘅你，一定會提埋馬德里體育會。實在馬體會於領隊施蒙尼執教下，已贏過2次西甲冠軍，另外歐聯都有2次亞軍。對比起皇馬同巴塞班費，馬體會能夠有上述成績已相當難得。星期一凌晨4點正，馬體會主場對維拉利爾，以主隊個勢，隨時可大炒對手。
馬體會有咁好成績，領隊施蒙尼可謂功不可沒。能夠執教球隊近12年咁耐，證明佢交到貨得到老闆滿意，日前正式動筆續約至2027年，如果合約順利完成，施蒙尼就會執教馬體會達16年之久。
講返近期演出，馬體會確可用著晒火去形容。事關剛剛歐聯對些路迪，馬體會於主場怒炒蘇格蘭代表6比0，完全當對手無到。講開主場，馬體會已錄得跨季16連勝，當中包括西甲及歐聯。今次面對中下游球隊維拉利爾，相信馬體會好有機會延續主場連勝紀錄。
維拉利爾周中去到塞浦路斯進行歐霸盃賽事，雖然以2比1贏海法馬卡比，但睇翻全場演出，維拉利爾係贏得辛苦，球員頗為耗力。如今轉到西甲又要面對有鑽石主場撐腰嘅馬體會，維拉利爾形勢上嚴重輸蝕。今場讓球為馬體會講一球/球半，捧「上盤」。
星期一朝早8點美職季後賽，哥倫布機員主場對阿特蘭大聯。基於雙方客勝一個回合，所以要踢埋決勝局。既然係爭晉級，無論主或客隊都唔會保留，相信今場係鬥攻場合。留意到今場入球大細中位數起平為3.5，證明操盤手都睇好今場大手交易，揀「大盤」。
早上10點05分，墨超有利昂主場對祖亞雷斯，利昂近況衰到痺，連續4場未贏過，最近仲以4比5不敵下游球隊普埃布拉。不過賠率方面完全睇好利昂，齋WIN熱到得1.4倍。呢類鬼盤信飛數好過信賽績，簡單揀「主勝」。 文：King Sir
馬體會 讓一球/球半 上盤
哥倫布機員 3.5 球大盤
利昂 主勝
