【英超】完勝剋星!阿仙奴2:0破白禮頓 夏維斯爭氣:頭一、兩個月好辛苦

終於贏番場!阿仙奴周日主場對「剋星」白禮頓,取得壓倒性優勢,完全唔畀對手有任何喘息空間,憑加比爾捷西斯、夏維斯入波,贏2:0。

阿仙奴近年畀白禮頓恰死,近10次對戰,兵工廠只贏過3場,其餘5敗2和。賽前唔少人擔心佢哋又會失分,但26:5嘅射門比數,足證阿仙奴今場取得幾大優勢,贏波天公地道。

兩隊周中都有歐戰,但兵源較弱兼多主力傷兵嘅白禮頓,明顯未及回氣,畀阿仙奴全面輾壓,完全冇還擊力,上半場零射門,係迪沙比出任海鷗領隊後,首次出現呢個情況。

阿仙奴一早應該開紀錄,加比爾馬天尼利、奧迪加特都錯失機會,直至53分鐘,藉對手中堅雲赫基頭槌解圍角球失誤,加比爾捷西斯頭槌預入空門,主隊終於領先。

之後阿仙奴繼續有大量攻門,夏維斯87分鐘藉白禮頓未及回防,半單刀射成2:0完場。阿仙奴全場26次射門,6次中目標,白禮頓6射1中,今場波就係咁懸殊。

賽後鎖定勝局嘅入波功臣夏維斯,當然難掩興奮之情:「白禮頓係一支好勁嘅球隊,佢哋踢得好好,不過我哋知道自己主場威力好強,所以唔驚,而且事情亦如我哋所願。作為一名進攻球員,入波或者助攻梗係正!係,最初加盟頭嗰一兩個月係辛苦,不過我只希望發揮最好嘅自己、漸入佳境。」

同時,另一支三甲球隊阿士東維拉,依然勇不可當,作客賓福特上半場落後0:1,阿歷斯摩蘭奴、奧尼屈堅斯77及85分鐘入波,助維拉反勝打少個嘅賓福特2:1,取得3連勝,經過17輪,仍然企穩前3位置。

屈堅斯倒戈奠勝。