又係呢個男人。墨西哥老牌門神奧祖亞，喺C組首輪撲出羅拔利雲度夫斯基嘅12碼，0:0賽和波蘭，令佢連續3屆成為決賽周風頭躉。
作為最強中鋒之一，羅拔仔喺波蘭缺乏支援，上屆決賽周零入球，今仗下半場自己搏得12碼，以為可以取得首個士哥，但射門畀奧祖亞捉到路撲出，繼續交白卷。
奧祖亞37歲，目前効力墨西哥球會阿美利加，同隊友古亞達度，以及美斯、C朗，同樣係決賽周五朝元老。
2006、2010年決賽周，奧祖亞已入選大軍，但只做後備，去到2014年世界盃，終於大放異彩，特別係對主辦國巴西，全場5個超級神救，連比利都盛讚佢有英國經典門神哥頓賓士嘅級數。
香港球迷亦藉當屆賽事，認識呢位門將，而且有莫名嘅喜愛，因為除咗好波之外，佢個樣真係幾似吳鎮宇，「Sam 哥」、「墨西哥吳鎮宇」等外號，令我哋倍感親切。
上屆俄羅斯決賽周，Sam哥繼續有料到，踢咗4場波，共有20個撲救，加埋今次撲出羅拔仔12碼，好多球迷讚佢真正世界級，係為世界盃而生嘅龍門。
雖然可以每4年威一次，但Sam哥足球世涯亦常有失意時。佢去過歐洲搵食，但發展麻麻，只効力阿些斯奧、馬拉加、標準列治等球會。
去年對加拿大出現低級失誤，導致球隊輸波，引爆墨西哥球迷怒火，向佢及家人發出死亡恐嚇，更特別針對Sam哥老婆（下圖），如果勸唔到老公退出國家隊，就要將其姦殺。
由於沙特阿拉伯爆冷贏阿根廷，C組真正大混戰，沙特3分帶頭，墨西哥、波蘭1分，阿根廷0分。周日凌晨3點，墨西哥會對阿根廷，Sam哥決戰美斯，會唔會真係由佢，粉碎球王冠軍夢呢？
