20年前，曾經有一位官仔骨骨嘅男人，白白淨淨、一頭飄逸長曲髮，望落就覺得佢係懶不羈嘅法國人，帶領名不經傳嘅塞內加爾，喺揭幕戰做低98冠軍法國，然後一路殺入世界盃8強，震撼球壇。
呢位塞內加爾傳奇主帥，叫做般奴梅特蘇，球員同教練生涯，幾乎與早前提過嘅連納特一樣，同樣曾喺低組別打滾，然後去非洲發展、一舉成名，梅特蘇除咗塞內加爾，亦教過畿內亞、阿聯酋、卡塔爾等國家隊。
2012年，梅特蘇獲中東豪門艾華斯賞識，邀請其接任馬納當拿離隊後嘅教練空缺，可惜上任僅3個月，梅特蘇確診末期結腸癌，癌細胞更已轉移至肺部及肝臟，與癌魔搏鬥1年後，梅特蘇撒手人寰，享年59歲。
梅特蘇同塞內加爾籍太太Viviane Dieye，育有三名子女，梅特蘇逝世後，Viviane Dieye喺意大利偶遇已離婚嘅連納特，二人嘅愛情故事就此開始。
連納特同梅特蘇一樣，喺世界盃首戰爆驚天大冷，分別力挫法國、阿根廷，當年塞內加爾成功突圍分組賽，教練之路相似、連品味都一樣嘅連納特，能否帶領沙特阿拉伯殺出重圍？今晚深夜3點，火併墨西哥後自有分曉。
