老竇係世界足球先生、總統、AC米蘭傳奇，作為佢個囝嘅添莫菲韋亞，壓力到底有幾大？「吓，冇嘢喎，佢幫我鋪平我嘅道路，我身為佢個囝，覺得好自豪。」
有番咁上下波齡嘅球迷，肯定記得韋亞。呢位AC米蘭傳奇，唔單止係首位贏得世界足球先生嘅非洲球員，目前更搖身一變成為利比里亞總統，做個個囝，難免會畀人拎嚟比較，不過美國國腳添莫菲韋亞，天性開朗不羈，完全冇理會外間嘅言論。
好多名將之後，活喺爸爸嘅成功之下，壓力的確想像唔到，而所謂星二代亦冇乜邊個掂，祖迪告魯夫、比利、馬納當拿囝囝……等等。
添莫菲韋亞極有可能係例外。「成日提我老竇會唔會厭？梗係唔會啦，佢幫咗我好多，你哋(記者)提佢嘅事蹟，只會令我覺得自豪、更有動力。」可能就係呢種坦白胸襟，令小韋亞急速成長，仲幫老竇彌補埋球員生涯嘅遺憾：出戰世界盃、取得入球！
上個星期，添莫菲韋亞為美國轟入一球，雖然該仗最終只係賽和威爾斯，但美國喺最後一場擊敗伊朗，成功出線16強，小韋亞幫老竇實現咗夢想，依家仲超額完成，當然，距離老竇嘅高度仲爭好遠，不過小韋亞得22歲，大把成長空間。
「我將呢個士哥送畀屋企人，佢哋今日都有嚟現場睇波，我爸爸應該會好享受呢個時刻。」
韋亞係上世紀90年代殿堂級射手，曾經效力巴黎聖日耳門、AC米蘭、車路士等豪門，1995年更成為金球獎及世界足球先生，係第一位獲得呢個成就嘅非洲球員。掛靴之後，韋亞致力改善利比里亞人民嘅生活，2018年，正式當選該國總統。
至於添莫菲韋亞，喺美國出生及長大，順理成章效力美國國家隊，佢喺14歲投效PSG青年軍，2019年再轉投里爾至今。坦然面對出身，唔會左扭右扭話自己點點點勤力，完全冇靠父蔭呢啲廢話，可能就係小韋亞嘅成功之道。今晚16強，預計小韋亞會繼續正選，挑戰荷蘭。
