咪叫我黑腳！佐真奴喺周六英超，補時3分鐘喺禁區外勁射，搞到馬天尼斯頭槌擺老烏，帶領阿仙奴作客4比2擊敗阿士東維拉，為爭標打番支及時強心針。
佐真奴由車路士轉會後，阿仙奴一直未好過，首仗對愛華頓爆大冷輸波，跟住對賓福特，又因VAR球證出現嚴重失誤，慘被迫和，上場對曼城更被徹底KO，對維拉賽前，唔少人開始串佢係超級黑腳，累阿仙奴冇咗冠軍。
由於湯馬士柏迪受傷，佐真奴今仗繼續做正選中場，上半場佢表現一般，阿仙奴落後一球。但下半場完全另外一個故事，呢位意大利中場重現歐國盃及歐聯冠軍卡士，多次手術刀傳送之餘，補時更成為入球功臣，助阿仙奴終於贏番場。
今場係兩代兵工廠主帥較量，維拉領隊艾美利作為「最熟悉的陌生人」，2018年接掌阿仙奴，不足年半就被解僱。艾美利之後轉教維拉利爾，曾與阿仙奴於2020/21球季歐霸盃4強交手，並將舊東家踢出局。去年11月回歸英超，今仗係佢喺英超首度倒戈，以為又會對阿仙奴給予沉重一擊，結果功虧一簣。
維拉今仗兩度領先，開波6分鐘已有斬獲，奧尼屈堅斯左路狂奔，推至禁區內起腳射遠柱入網，亦係佢連續第4場有士哥。影星湯漢斯係維拉擁躉，今仗都有入場睇波，賽前佢仲入更衣室打氣，奧尼屈堅斯入靚波後，鏡頭影到佢喺看台非常興奮。
雖然布卡約沙卡16分鐘，藉禁區外勁射掛網扳平，但維拉32分鐘又領先，入波仲要係古天奴。艾美利入主後，一般預期呢位巴西前國腳會玩完，點知佢有機會踢番正選。事實上古天奴專恰阿仙奴，職業生涯12次對陣，已有5入球1助攻。
下半場阿仙奴全力反撲，61分鐘由辛真高禁區外勁射扳平，之後雖然仍有唔少攻勢，但入球把握力依然不足，尤其奧迪加特空門失機最離譜，更曾被維拉翼鋒里安拜尼射中門角，幾乎三度落後。
以為阿仙奴又再失分，補時3分鐘，佐真奴禁區邊放重炮，中楣後再反彈落維拉門將馬天尼斯個頭入網；馬天尼利完場前射入空門，阿仙奴贏4比2，阿迪達屈咗好耐，終於再現笑容。
