周六英超早場大戰，曼城主場對利物浦，正爭逐聯賽冠軍的嘅曼城，以4比1反勝利物浦。全場過程相當之輕鬆，基亞利殊一射一傳最搶鏡，一場極具說服力嘅勝利。
今場曼城陣容唔算太完整，唔單止缺少主力「士哥拿」夏蘭特，而且左腳仔霍頓都唔出得。因此領隊哥迪奧拿派出阿根廷世盃功臣之一，侯利恩艾華利斯擔當正選。
上半場初段曼城佔有不少控球權，但率先入球係紅軍利物浦。17分鐘祖達接應長傳入禁區，背向龍門之下橫傳畀沙拿勁射成1比0。
曼城失球後反而激發起鬥心，28分鐘德國國腳兼剛剛做爸爸嘅根度簡，於禁區頂左傳到基亞利殊腳下，後者再橫傳畀侯利因艾華利斯射成1比1平手。上半場餘下時間再無入球，雙方返更衣室再作部署。
下半場開始53秒，曼城就搵到入球機會，侯利恩艾華利斯大腳長傳，右翼馬列斯再將機會交畀迪布尼。呢位新任比利時國家隊隊長不付所托射入，為曼城反超前成2比1。去到52分鐘，根度簡門前補中成3比1。
利物浦於落後情況下，於69分鐘一次過換入4名球員，當中包括紐尼斯以及費明奴，可惜調動後變化唔大，參與度亦有限，最慘係去到74分鐘，曼城迪布尼造就基亞利殊射成4比1。經過今場賽事，利物浦已連續3場落敗，點樣扭轉頹勢，真係要考考領隊高普。
