歐洲各大聯賽已經休戰，世界盃開打前，C朗投下終極震撼彈！佢接受名嘴老友皮爾斯摩根專訪，公然狂插曼聯同坦克格：「我被曼聯出賣，絕對唔會尊重坦哈格！」
C朗近兩場波都因病缺陣，喺出發去葡萄牙國家隊報到之前，呢位曼聯巨星就上皮爾斯摩根嘅節目接受訪問，講吓呢兩年發生咗啲咩事。
「費格遜同我講，話我冇可能去曼城。跟住我應承咗、返咗嚟了。」C朗證實呢個傳聞係堅嘅。
但返到嚟後，C朗就打咗個突：「費格遜離隊後，曼聯完全冇進步過！包括所有設施，都同以前一模一樣。曼聯內部有問題，好多人包括費格遜都知，但冇去正視，所以曼聯去唔到曼城、利物浦同依家阿仙奴嘅水平，我認為球迷有權知道真相。」
今年4月經歷龍鳳胎兒子夭折，C朗話自己今夏冇歸隊參加季前集訓，係因為當時3個月大嘅囡囡入院：「我想留低陪個囡，但球會竟然覺得我係講大話！我覺得受到傷害。」
「曼聯想逼我走，唔單止係領隊，仲有其他人，我被曼聯出賣，佢哋搵我做代罪羔羊！呢件事喺上季開始已經發生！」
講到領隊，C朗更加公然插勻蘭歷克同坦克：「蘭歷克，佢連領隊都唔係，憑咩教曼聯？我完全唔知佢乜水。」
「我唔會尊重坦哈格，因為佢都唔尊重我！對於嗰啲唔尊重我嘅人，我永遠都唔會尊重佢。」
關於朗尼早前嘅言論，C朗就話：「我唔知朗尼點解咁樣批評我，可能因為佢一早掛咗靴，而我仲踢緊高水平賽事。我唔會話自己比佢更好，但呢個係事實。」
關於球迷，C朗咁講：「我愛曼聯同曼聯球迷，佢哋一直撐我。創造之前先要毀滅，如果曼聯（改革）由毀滅我開始，我冇問題。」
「足球世界最重要嘅嘢，係球迷。對我嚟講，球迷就是一切，亦係我做今次訪問嘅原因，因為我要畀球迷知，我係諗緊乜。」
完整訪問尚未正式見街，估計內容可能更加震撼。C朗爆得大鑊，都肯定預咗離隊，問題係經過埋今次公開數臭曼聯，仲有邊間球會敢收留佢？
“I feel betrayed”. Cristiano Ronaldo.@PiersUncensored 🚨🎥⤵️ pic.twitter.com/VJ2FO84SVA
— Fabrizio Romano (@FabrizioRomano) November 13, 2022
