2022年最後一日，終於落實。沙特阿拉伯球會艾納斯官宣，已同C朗簽約兩年半。
C朗除以球員身份，効力球會至2025年外，亦會以足球大使身份，協助沙特聯同埃及、希臘，爭取2030世界盃合辦權。
整份合約將超過2億歐元（約17億港元），令37歲C朗，成為世界最高收入足球員。好勝如佢，仍然可以締造一個最高紀錄，起碼心理上仲有得威。
艾納斯原本7號嘅球員，早早已讓出號碼，迎接「CR7」駕到，會方亦準備好推出新C朗波衫，起碼喺中東會賣斷市。
未加盟艾納斯前，C朗効力過4支球隊，2002年自葡萄牙球會士砵亭出道，之後兩度効力曼聯，仲有皇家馬德里、祖雲達斯。20年輝煌職業生涯，終於首度離開歐洲主流聯賽。
1145場比賽，819球，C朗依然係史上有正式紀錄賽事中，入波最多嘅球員，國家隊連球會冠軍共34個。
隨住C朗離開主流賽事，美斯圓世盃冠軍夢，絕代雙驕爭雄20年，已到終局時刻；比利亦剛隨馬納當拿駕鶴西歸，象徵一個足球新紀元，由2023年正式展開。
