父親遭綁架仍未獲釋，未有影響路易斯迪亞斯球場上表現，哥倫比亞前鋒周日成為紅軍英雄，後備入替補時5分鐘入波，令利物浦作客1:1迫和盧頓，未致爆出超級大冷門。
入波之後，迪亞斯拉起波衫露出T恤，上面寫住：Libertad para papa，意思即係「放我爸爸」。佢父母早前被哥倫比亞反政府武裝組織ELN（哥倫比亞民族解放軍）綁架，目前媽媽已經被救出，但爸爸仍然下落不明。
實力強弱懸殊，但利物浦幾乎爆大冷輸波，原因係全場不斷錯失機會，24次射門，6次中目標，但只能喺補時最後階段，靠一次高空攻勢入波，失分畀榜尾球隊。
如果利物浦輸波，中鋒達雲紐尼斯必然又做罪人，全場有9次射門，均失諸交臂，上半場射中楣欠運，但下半場錯失世紀大餐士，絕對無可饒恕。當時沙拿頭槌二傳遠柱，烏拉圭國腳無人看管，離空門幾碼一抽，竟然大打飛機，有咁高射到咁高，睇到高普火都嚟埋，係咁狂鬧。
盧頓死守之餘，反擊做得唔錯，製造過險象，終於80分鐘有收穫，又係一次快速突襲，幾腳波已到利物浦門前，由出身曼聯青年軍嘅荷蘭中場鍾達希射入。
高普83分鐘出最後武器，路易斯迪亞斯臨危受命，補時5分鐘接應哈維艾利洛傳送，力壓對手頭槌破網，助利物浦搶回1分，以24分排第3位，落後榜首曼城3分。
利物浦領隊高普賽後話：「精彩、激動、神奇！我相信冇人明白迪亞斯依家嘅感受，佢對呢件事無能為力。足球有時可以喺黑暗日子帶嚟暫時性歡樂，我哋會支持佢。」
