白禮頓近期英超成績麻麻，但喺歐霸盃反而越戰越勇，周五凌晨B組作客以2:0擊敗阿積士，「雙殺」呢支今季已淪為荷甲下游嘅傳統班霸，保持直接出線嘅機會。
白禮頓傷兵滿營，但佢哋喺歐霸會用上唔少副選，而且表現唔錯，其中一個原因係前鋒安素法迪，呢位巴塞隆拿借將作為歐霸主力，踢出佢應有嘅高卡士，令白禮頓連贏兩場，以7分升上次席，只落後馬賽1分。
兩個星期前，白禮頓主場贏阿積士2:0，不過阿積士換帥後頗有反彈之勢，早前就連贏兩場，包括上仗大勝海倫芬4:1。
相反，白禮頓最近5場英超不勝，好彩去到歐戰氣勢返晒嚟，15分鐘，白禮頓中場阿迪加獲阿積士誤傳送大禮，即時快傳畀法迪，呢位容易收傷嘅天才，射入今季個人第4個入球。
53分鐘，法迪中路引球推進，投桃報李交畀阿迪加，呢位科特迪瓦翼鋒不負所托射成2:0，最終白禮頓保住2:0勝局完場。
總計近5場，安素法迪為白禮頓轟入3球加1次助攻，當中包括射破曼城。其實法迪一直被稱為美斯接班人，啱啱出道嗰陣，身價一度達到8000萬歐，可惜由於傷病，令法迪狀態大不如前。
此前，轉會權威Romano話，法迪外借白禮頓嘅交易不包含買斷條款，換句話說，巴塞將法迪借畀白禮頓，純粹為咗畀機會佢鍛鍊，之後收歸己用，明夏法迪幾可肯定會返巴塞，以佢目前嘅表現，將大大影響菲歷斯喺巴塞嘅前途。
因為二人都係踢前場左路，巴塞要買斷菲歷斯嘅費用實在太高，加上菲歷斯剛經歷10場入球荒，按照現時形勢發展，法迪絕對有望再成塞寵兒。
