日本力戰下於12碼階段不敵克羅地亞，球員們的確盡晒力，但有唔少球迷都覺得，點解日本處理12碼會咁差？之後輪到西班牙，又係3個炒晒，究竟係咩原因？球員嘅抗壓能力，或者係其中一個主因。
提到抗壓能力，就不得不提克羅地亞眾將，龍門利華高域固然出色，而處理極刑嘅球員，抗壓力的確要好高，而呢啲係需要經驗去累積，克羅地亞早前互射12碼展示出嚟嘅淡定，其實係近年淚與汗換番嚟嘅成果！
克羅地亞對上7次淘汰賽：
2008年歐國盃8強，12碼不敵土耳其；
2016年歐國盃16強，加時不敵葡萄牙0:1；
2018年世界盃，16強、8強、4強都係戰至加時或12碼，淘汰丹麥、俄羅斯及英格蘭。
2021歐國盃16強，加時不敵西班牙3:5。
連埋今屆贏日本，亦即係話，克羅地亞近8次淘汰賽，有7次要踢到加時或者12碼，由以往嘅輸多贏少，到近5次加時/12碼贏4次，呢啲抗壓能力，絕對係大賽經驗累積返嚟。
當然，英格蘭射極12碼都輸，大家可能話有例外，但其實英格蘭當中橫跨咗幾代，而2008年克羅地亞到依家2022，都只係一代上落，隊長摩迪更加係貫穿當中嘅靈魂人物，高華錫、卡拉馬歷、波索域、比列錫等等，亦係4年前亞軍成員，對傳授加時及12碼經驗極為重要。
所以，如果畀克羅地亞頂到加時，球隊嘅勝算就會增加，絕非肉眼判斷，而係有數據支持，相信巴西已經做好晒功課，嚟緊兩隊對碰結果係點，拭目以待。
