C朗首度出戰沙特阿拉伯聯賽，表現未如理想，唔止冇波入，仲有蝦碌嘢，英國傳媒乘機踩多兩腳，寸佢神話已經破滅。
英國《每日鏡報》係咁講，其實C朗自有歷史地位，冇神話破滅呢回事，但經過曼聯事件，英國傳媒自然見縫插針，有位即入。C朗拿以天價15億港紙，簽約中東豪門艾納斯，周一凌晨上演聯賽地標戰，自然備受矚目。
C朗上場表演賽，為利雅得明星隊上陣，對巴黎聖日耳門踢得唔錯，仲有兩個入波，但今仗為新球會主場出擊，對伊蒂法克表現麻麻，全場4次射門只得1次中龍，就連賽前熱身都走錯去對手場區，要隊友叫番佢返嚟，認真蝦碌。
巨星加盟，艾納斯擁躉勁興奮，大批球迷拎晒橫額入場打氣，但37歲老將未能為佢哋帶嚟精彩演出，頭兩次掂波甩腳，之後招牌罰球，仲有扣大位射門，都離行離列，下半場一次禁區內扭波窄位射門，係唯一命中目標攻門。
雖然C朗冇波入，艾納斯仍憑巴西中場泰列斯卡入波，以1比0勝出，以1分領先踢多1場嘅艾希拉排榜首，睇吓C朗可唔可以幫球隊帶返終點啦！
艾納斯教練魯迪加西亞，賽後只能為真正揸弗人保駕護航：「C朗係足球史上最佳球員之一，我哋要盡可能為佢製造最理想嘅環境，希望佢可以享受足球。」
