白禮頓再展示激情DNA？歐霸盃B組第二輪，白禮頓喺落後馬賽兩球嘅情況下，力追至完場前兩分鐘先扳平2:2，雖然兩戰過後只得1分喺小組包艇，不過教練迪薩比一樣開心：「我哋終於展示到球隊DNA！」
首戰歐洲賽嘅白禮頓，兩個禮拜前歐霸第一擊不敵AEK雅典，今仗作客更強嘅馬賽，三笘薰、蘇利馬治等主力正選搏殺，不過馬賽經驗豐富，有奧巴美揚同祖亞昆哥利亞領軍，一開波已掌控大局。
19分鐘，馬賽憑一個靚組織，梅邊巴撞入領先1:0，唔夠1分鐘，白禮頓仲未站穩陣腳，隊長登克「漏油」犯錯，馬賽嘅哈列把握機會快攻傳中，維希圖撞射，比數擴大至2:0。
白禮頓一路捱打，好彩換邊後終於有起色，54分鐘，三笘薰左路傳中，哥斯追成1:2。一直戰至85分鐘，林迪博到12碼，祖奧柏度搞掂，白禮頓苦戰下終於追和2:2完場，取得球會史上歐戰第1分。
賽後白禮頓主教練迪薩比受訪，認為隊波喺上半場咁唔掂，係因為受到馬賽主場嘅氣氛影響：「我知道我哋仲係一間小球會，我哋喺歐洲賽展示咗質素，但好多時都會受周圍氣氛嘅影響，一班球員仍然喺適應當中。」
「不過，我仍然為今場波感到開心。我哋可以輸，但唔可以失去我哋嘅球隊DNA，就係鬥心、勇敢同埋激情。我唔係一個偉大嘅教練，但今季我要同班球員一齊去進步，特別係要適應一周多賽。」
白禮頓上仗英超被維拉血洗6:1，而本周英超嘅對手係利物浦，咁啱紅軍同樣要出戰歐霸，佢哋喺主場以2:0擊敗聖基萊斯聯，新兵加芬比成功開齋，不過領隊高普似乎唔太滿意球員嘅表現：「我哋失咗好多死球，冇失波係好彩，我哋應該可以做得更好。」
