【歐霸】利物浦8強抽中阿特蘭大 走線有利 高普爭4冠,同沙比決賽見?

好多人期待,今屆歐霸盃會有利華古遜對利物浦,等紅軍「未來領隊」沙比阿朗素可以挑戰高普,順便等大家睇吓辦。

經過8強抽籤,兩大熱門都要打入決賽先有機會碰頭!足智彩冠軍賠率得1.9倍嘅利物浦身處上線,8強對阿特蘭大;同線仲有賓菲加、馬賽。下線AC米蘭對羅馬、次熱3.5倍嘅利華古遜對韋斯咸。8強首回合4月12號凌晨,次回合一周之後。

雖則話歐霸卡士唔及歐聯,但睇今屆8強,牌面絕對唔失禮。利物浦算抽到好籤,對阿特蘭大過關機會仍高,但高普離開前爭取做4冠王,仍然要先睇周日英足盃8強對曼聯一仗嘅戰果。

AC米蘭對羅馬屬意甲內鬨,當然睇頭十足。雖然羅馬由迪羅斯代替摩連奴執教後水準提高,目前排意甲第5位,同A米係旗鼓相當,但計往績,A米近11次對賽8勝3和未輸過,似乎機會仍相對樂觀。

利華古遜今季各項賽事未輸過,但一定贏硬韋斯咸咩?又未必!事關錘仔幫水準雖然唔穩定,但有時堅起上嚟真係嚇死人,加上利華上圈兩鬥卡拉巴克都一度落後兩球,佢哋踢歐戰似乎不及聯賽集中,莫天才有冇機會偷到雞?

賓菲加對馬賽,奧巴美揚喺馬賽全面翻生,唔止入波多,整體水準仲不斷提升,如果佢可以帶領球隊打入4強以至決賽,將係一個無比振奮嘅重生故事。

歐霸8強形勢:
上線
賓菲加(葡萄牙) vs 馬賽(法國)
利物浦(英格蘭) vs 阿特蘭大(意大利)
下線
AC米蘭(意大利) vs 羅馬(意大利)
利華古遜(德國) vs 韋斯咸(英格蘭)