【歐聯】34歲老將變神兵!後備荷西路連入兩粒 皇馬絕殺拜仁;煞星卡尼 破錦標荒仲有最後機會

天降神兵!肥安有計!周四凌晨歐聯4強次回合,皇家馬德里靠後備荷西路完場前3分鐘連入2球,主場2:1反勝拜仁慕尼黑,兩回合計贏4:3,殺入決賽惡鬥多蒙特。

34歲嘅荷西路,81分鐘先至後備入替,不過就梅開二度,唔單止做咗皇馬超級大英雄,更以34歲42日,成為歐聯史上喺淘汰賽後備上陣入兩球嘅最年長球員。

荷西路係皇馬青訓產品,之後外闖多年,効力過德甲賀芬咸、英冠史篤城、紐卡素、拉科魯尼亞、愛斯賓奴等等,直至今季因為賓施馬去沙特掘金,祖些奴有機會以借將身份重返皇馬。荷西路話:「今日呢種表現,一直係我嘅夢想!不過即使係再甜嘅夢,都未必有絕到咁嘅情況!太不可思議喇,我想講,皇馬精神,就係從來都唔會放棄!」

皇馬今場波形勢稍佔優,開賽13分鐘,就有雲尼斯奧斯射中柱,之後洛迪高高斯近門補射,又被拜仁門將紐亞救出,之後拜仁都有幾次攻門,但無功而還,半場0:0。

下半場,皇馬搞唔掂紐亞,更於68分鐘先失守,艾方素戴維斯左路禁區大位射入開紀錄。其後皇馬曾經食詐糊,直至88分鐘,後備上陣嘅荷西路趁紐亞甩手,上前補中追平。3分鐘後,荷西路又喺門前接應傳中射入,皇馬反勝2:1,6月2日凌晨3點,將會同多蒙特爭奪冠軍。

領隊安察洛堤神調動,再次產生神奇效果,真係要寫個服字,佢有機會繼前季後,再帶領皇馬成為西甲、歐聯雙料冠軍。賽後安帥當然對後備神兵讚不絕口:「荷西路今季貢獻良多,雖然上陣機會少,但佢永遠都付出所有,而且從來唔會失去自信,正正反映出我哋呢支球隊嘅心理質素。」

拜仁已經輸晒國內錦標,一度領先以為可以撈番個大耳朵盃,可惜最終都係臨尾香,今季注定四大皆空。「地獄黑仔王」哈利卡尼想今季攞冠軍,惟有寄望英格蘭喺歐國盃生生性性。