【歐聯】兩位40+神鋒!卡尼自救入兩粒 拜仁淘汰拉素;麥總射穿網 聖日耳門入8強

哈利卡尼保住破冠軍魔咒機會,杜曹亦暫時保住帥位。拜仁慕尼黑周三凌晨於歐聯16强首回合,主場3:0挫拉素,總比數贏3:1晉級。

拜仁首回合輸0:1,聯賽亦遠遠落後利華古遜,如果歐聯出埋局,今季就幾可肯定乜冠軍都冇,哈利卡尼入幾多波亦補唔番,都係超級黑腳。

賽前更有報導,話哈利卡尼係「撐杜曹幫」,湯馬士梅拿係「反杜曹幫」,如果今仗被淘汰,杜曹亦會提早落台。結果兩大主力唔單止冇分裂,仲分別入波做晉級英雄,關鍵時刻依然可靠。

拜仁全場㩒住拉素砌,38分鐘卡尼頭槌開紀錄,湯馬士梅拿完半場前亦以頭槌建功。下半場拜仁仍控制戰局,利萊辛尼射門被門將擋出,哈利卡尼執死雞射成3:0完場。

姑勿論最後有冇冠軍,哈利卡尼個人能力,仍然好難挑剔。佢憑藉呢兩個入球,今個賽季各項賽事已經射入33球,追平上季喺熱刺嘅總入球數。上季卡尼各項賽事出場49次,射入32球,送出5次助攻。本賽季至今,各項賽事出場33次,入33球、8次助攻;同時佢喺各項歐洲盃賽已入51球,係歐戰士哥最多嘅英格蘭球員。

今季到目前為止,五大聯賽之中,只有兩位球員喺各項賽事參與入球超過40個。除咗哈利卡尼,仲有麥巴比。

巴黎聖日耳門作客2:1贏皇家蘇斯達,兩回合以4:1晉級。麥巴比包辦兩個士哥,今季暫時入34球、7個助攻。佢入第一粒尤其精彩,喺多人嚴防之下,仍然個人表演,勁抽遠柱搞掂,力度之強,網都畀佢射穿,要工作人員搞一輪至恢復比賽。