盧卡古大翻身！歐國盃外圍賽F組煞科，一早已篤定出線嘅比利時，今晨上演「大四喜」，助球隊主場大勝阿塞拜疆5:0。盧卡古喺國際賽累積入83球，進佔歷史射手榜第7位。
比利時上半場已極速撻着，藉人多打人少嘅優勢領先4球，而且4球都係盧卡古頭頂腳踢轟入，個人國際賽入球已有83個，超越波蘭王牌利雲度夫斯基，與阿聯酋前鋒馬加侯特，並列史上射手榜第7位。
比利時黃金一代逐漸退場，最可惜嘅係曾經嘅世三夏薩特掛靴，不過後起之秀一啲都唔失禮，除咗盧卡古擔大旗，阿仙奴翼鋒托沙、曼城翼鋒杜古亦相當有卡士，盧卡古一換邊後便被換走，最終埋齋嘅係托沙，而杜古則交出兩個助攻。
5:0大勝阿塞拜疆後，比利時亦順利壓過奧地利，鎖定小組首名資格，成績係6勝2和。而盧卡古喺整屆賽事共入14球，喺歐國外射手榜亦領先C朗4球。
盧卡古今季20戰入20球，成為羅馬寵兒，摩連奴可以話係執到寶，而比利時領隊泰迪斯高賽後，亦大讚一眾手足，更特別點名激讚盧卡古：「盧卡古今場表現可以用完美嚟形容，佢只要有機會起腳，就必定係一個入波。」
至於原本同盧卡古同錄10個士哥嘅C朗，喺葡萄牙對冰島一仗繼續正選，可惜顆粒無收，葡萄牙先由般奴轟入世界波領先，賀達66分鐘射成2:0埋齋，C朗雖無緣成為歐國外神射手，不過葡萄牙10戰全勝勁爆出線，C朗功勞絕不可抹殺。
