歐聯分組賽今晚全面展開，首晚共8場賽事，當中以早場（周三凌晨00:45）揭幕戰最為矚目，英超豪門紐卡素會作客意甲老牌班霸AC米蘭，上演死亡F組大戰。
事隔20年，紐卡素終於重返歐聯，咁啱當年最後一場作客，正是去聖西路球場，今晚重遊此地，對球會無疑別具意義。更加特別嘅係，中場辛度東拿利加盟紐卡素僅2個月，即要倒戈最喜愛嘅球會AC米蘭，更加百感交集。
紐卡素上次喺歐聯分組賽亮相，已經係2002-2003球季嘅事，當時由卜比笠臣領軍，並擁有舒利亞呢位超級神鋒，仲有比拿美、羅拔同蘇蘭奴等等。不過大家都知，紐記之後沉淪，更曾經兩度降落英冠，直至沙特財團喺前年入主後，喺賀維帶領下慢慢復甦，喺上季英超更以第4名衝線、重返歐聯。
不幸嘅係，紐記喺歐聯跌入死亡之組，今晚回歸歐聯第一擊就要作客A米，咁啱紐卡素上次歐聯最後一場作客，就係造訪聖西路，當時對手係國際米蘭，踢成2:2。
嗰仗射入兩球嘅舒利亞話：「唔敢相信已經係20年前嘅事喇……我冇意識到嗰場係紐卡素喺歐聯嘅最後一場作客，更加估唔到今次會重返聖西路。我對依家呢支紐卡素好有信心，佢哋有能力擊敗AC米蘭。」
今晚對紐卡素嚟講別具歷史意義之外，中場辛度東拿利嘅感受應該更加深。事關佢好鍾意AC米蘭，今夏卻意外上「紐」。紐卡素主帥賀維話：「可以咁快就返到聖西路比賽，東拿利肯定好興奮，佢上場英超因傷做後備，但佢已經準備好喺歐聯復出。」
歐聯分組賽首日秩序
周三00:45 AC米蘭 vs 紐卡素
周三00:45 年青人 vs RB萊比錫
周三03:00 巴塞隆拿 vs 安特衛普
周三03:00 曼城 vs 紅星
周三03:00 巴黎聖日耳門 vs 多蒙特
周三03:00 拉素 vs 馬德里體育會
周三03:00 飛燕諾 vs 些路迪
周三03:00 薩克達 vs 波圖
