【歐國盃】最精彩一戰!2:1反勝土耳其 荷蘭時隔20年再闖4強;朗奴高文:唔怕英格蘭

4強誕生!尋晚歐國盃尾場,果然係最精彩一戰,荷蘭連入2球,以2比1反勝土耳其,繼2004年後再闖歐國盃4強,對手會係英格蘭;而另一場準決賽,就會係西班牙對法國。

荷蘭今場繼續係迪比掛帥,配合加普、沙維施蒙斯攻堅,至於一向主攻嘅土耳其,由於核心中堅迪美羅停賽,今場改踢5後衛陣式,中場核心查漢奴古停賽期滿復出。

荷蘭一開波就搶攻,迪比殺入禁區射高。12分鐘,杜費斯半射半傳柱邊出界,轉頭沙維西蒙斯熨射高出。土耳其企穩陣腳,即再次憑角球入波,35分鐘角球被頂出,艾達古拿拎到波後再交靚傳中,另一中堅艾卡耶甸遠柱接應頂入,半場領先1比0。

荷蘭半場果斷換入韋格賀斯,踢法更直接。不過土耳其嘅死球極具威脅,古拿罰球僅中外柱出界。戰至70分鐘,荷蘭終憑迪維積接應角球頂入,扳平1比1,6分鐘後,鄧費斯右路傳中,梅迪穆度亞喺加普力逼下擺烏龍,荷蘭反超2比1,之後再頂住土耳其狂攻,殺入4強,將鬥英格蘭。

荷蘭成功反勝,教練朗奴高文話今次成績,絕對令外界意想不到,佢仲話唔會驚英格蘭:「英格蘭擁有出色嘅球員,我哋一樣有。我為荷蘭嘅支持者感到自豪,因為我哋入4強,係無人預計到嘅事。」

荷蘭對上一次殺入歐國盃4強係2004年,啱啱好係20年前,該屆荷蘭喺4強不敵東道主葡萄牙。