波蘭以一個得失球差，壓倒墨西哥出線，過程驚險兼符碌，如果畀阿根廷入多粒，或者墨西哥砌多沙特阿拉伯一球，結果已逆轉，但無論如何，首席功臣，一定係門將施捷斯尼。
雖然波蘭喺C組最後一輪以0比2不敵阿根廷，不過施捷斯尼上半場救出美斯12碼，非常關鍵。施捷斯尼繼上仗對沙特後，連續2場撲出12碼，一手為波蘭換嚟16強資格。
施捷斯尼表現勁搶鏡，上半場39分鐘雖然被罰12碼，不過施捷斯尼飛身單手拍出球王嘅勁射，呢位祖雲達斯門將今仗作出9次撲救，係今屆目前最高紀錄。
其實施捷斯尼上場對沙特已救出一次12碼，連同今仗再救埋美斯極刑，令佢成為自1966年後，第3個喺單屆決賽周兩次撲出12碼(唔計互射12碼)嘅龍門，對上一個係2002年美國嘅費度。
施捷斯尼賽後自爆，球證準備睇VAR嗰陣，佢同美斯輸賭：「我同美斯賭100蚊（歐元），球證唔會判罰12碼，結果我輸咗，不過我救番呢球波。我唔知世界盃可唔可以咁做，或者我會被罰停賽㗎，不過，who cares！」
施捷斯尼32歲，2006年加入阿仙奴青訓系統，2008年被雲格提拔上A隊，曾經受重用，但整體都係浮浮沉沉。
2014-15球季，哥倫比亞門將奧斯賓拿來投後，施捷斯尼表現滑落，當中作客0:2負修咸頓聯賽中，球隊兩個失球都係施捷斯尼嘅失誤所致，佢喺失球後立即喺龍門底攞起水樽飲水嘅動作，令佢被球迷串爆為「飲水機」。失意英超，施捷斯尼2017年轉投祖雲達斯，技術、心理質素轉趨成熟，終於奠定正選席位。
對阿根廷賽後，舒利亞同里奧費迪南都盛讚CCC尼，老舒話：「佢上半場除咗有幾次關鍵撲救，最重要係救出12碼，超精彩。」里奧費迪南仲堅：「我認為佢係世界上最佳門將之一。」
