球壇上出過唔少超新星，十幾歲仔就畀人捧到天咁高。但又有幾多個可以長處頂峰，於高水平舞台不斷突破自己呢！意大利國腳艾沙拉維，正正就係失敗例子。但正所謂三十而立，有過歷練嘅「小法老」，今季演出確實畀到大家唔少驚喜。
基於爸爸係埃及人，因此於意大利熱拿亞出世嘅艾沙拉維，有個綽號叫「小法老」。佢14歲就加入熱拿亞做青年軍，經過2年訓練就以16歲之齡，於意甲首度亮相。18歲外借到意乙帕多瓦即光芒四射，成為意乙最佳球員。
當時有唔媒體用迪比亞路同佢相提並論，一來雙方都踢過帕多瓦，二來都係天蠍座，其三係踢法相似。前意大利國家隊領隊納比講過，艾沙拉維令佢諗返起迪比亞路，佢哋都好鍾意於邊陲運球，然係拐入中路搵攻門機會。
艾沙拉維踢得好，帕多瓦當然想買，唯母會熱拿亞覆返對方，小法老已經畀大球隊「卜咗」，所講嘅就係AC米蘭。2011年6月，紅黑兵團以總值2000萬歐元，將小法老帶去米蘭市。其實去到AC米蘭頭半年，艾沙拉維無乜出場機會，有傳佢會外借去其他球隊，吸收吓經驗先返嚟。但當時主席加利安尼同埋領隊阿里基都肯再畀機會佢，果然，艾沙拉維無令人失望。
於12/13球季，艾沙拉維迎來職業生涯高峰，包括歐聯對辛尼特取得入球，成為AC米蘭史上最年輕歐聯入球者，當時係19歲342日。當季AC米蘭取得聯賽季軍，艾沙拉維亦以16球成為球隊首席士哥拿，於當屆神射手榜排第3名。
以為一帆風順，點知接二連三嘅傷患，令小法老出場次數銳減，於13/14年只為AC米蘭上陣過9場。雖然14/15年球季有改善，但都上陣場數都唔足廿場。如是者艾沙拉維人氣急轉直下，最終被棄用兼外借到法甲法摩納哥。不過小法老狀態不足仍然被投閒置散，最後又借返去意甲羅馬。
艾沙拉維去到羅馬，無論出場次數及入球都顯著回升。經歷4個球季後，艾沙拉維作出人生其中1個錯誤決定，就係轉投中超上海申花。小法老完全適應唔到大陸生活，加上受舊患纏繞，混混噩噩渡過2個球季，上陣次場合計都不足20場。亞洲之遊可以用慘淡收場去形容，故2021年1月雙方終止合約，艾沙拉維以自由身回歸羅馬。
有時真係人夾人緣，艾沙拉維返到羅馬又「翻生」，雖然於領摩連奴麾下唔係必然正選，但每次落場都交到貨，上季更協助球隊贏得首屆歐協聯冠軍。今季於聯賽及盃賽，艾沙拉維已經上陣超過36場兼取得6個入球。特別喺幾場關鍵大戰，艾沙拉維都發揮到作用，最近期例子就係歐霸盃8強次回合，作客飛燕諾時有入球，協助球隊晉身4強。
今季都去到尾段，羅馬唔單止要為歐霸盃打拼，仲要保住聯賽前4。今周聯賽倒戈AC米蘭，對於羅馬及艾沙拉維嚟講都好重要。事關現時雙方同得56，排積分榜第4及5位，賽果直接影響來季歐聯資格。小法老亦都要話畀對手聽，當年你AC米蘭放棄我係錯誤決定，今日我一樣過得美好。
