【歐霸】摩佬招牌 反擊14秒!羅馬2:0贏皇蘇;祖記1:0弗賴堡 普巴又搞事後備都冇

意大利球隊歐洲賽翻身,除咗3隊殺入歐聯16強,歐霸盃一樣有料到。羅馬、祖雲達斯喺16強首回合同傳捷報,出線佔先機。

羅馬主場2比0挫皇家蘇斯達,開波13分鐘,出現招牌摩氏反擊,由後場搶波,到譚美阿巴謙右路傳中,艾沙拉維門前撞入,全程一氣呵成,只需14秒,令羅馬主場high爆。

87分鐘入多球,羅馬晉級機會大為提高,保羅戴巴拿開角球,後衞甘巴拿助攻頂入,2比0完場,繼擊敗祖雲達斯後再贏一仗。

摩連奴喺歐洲賽保持威力,佢對頭人則被球會禁賽。祖雲達斯主場1比0挫弗賴堡,保羅普巴連後備都冇。

受傷長抖,復出僅兩仗,普巴又再搞事,佢因為賽前會議遲到,畀球會紀律處分,冇得上陣。

冇咗麻煩友,面對弗賴堡,祖記依然夠殺有餘,可惜仍錯失唔少機會,戰至53分鐘,由迪馬利亞頭槌攻門破網,小勝1比0。

爭冠焦點唔單止意甲同英超雙雄,仲有佢哋,西維爾主場2比0擊敗費倫巴治,入8強佔先機。西維爾今季西甲成績差,但歐霸盃永遠唔可以將佢輕視,6奪冠軍,證明同此盃有緣到爆。