年薪16.5億 搵到2030!C朗接受沙特球會報價 因為真係冇得揀?

C朗下一站……沙特?歐洲已好難再有大球會吼佢,食住CR7品牌,繼續搵錢最實際。葡萄牙大報《紀錄報》指,C朗已打算接受沙特阿拉伯球會艾納斯報價,份約仲會去到2030年。

C朗已幾乎向所有有份踢歐聯嘅球隊自薦,但無一例外全食閉門羹。冇計,上半個球季同世界盃期間,見到C朗喺曼聯同葡萄牙嘅表現,相比巔峰期,可以話慘不忍睹,加上佢好勝性格、受訪爆大鑊呢單嘢,就更加冇球會敢要佢。

現實始終要面對,C朗亦唔例外,既然唔能夠喺頂級聯賽追求榮譽,去西亞賺更多更多錢,作為足球生命最後一站,似乎成為唯一選擇。

著名記者Romano指,艾納斯已開出兩年半合同,2025年6月完約,年收入為2億歐元(約港幣16億5000萬)。

《馬卡報》則指,2025年球員合同到期後,C朗就會以大使身份,幫助沙特、埃及、希臘共同申辦2030年世界盃決賽周;2030年世界盃前,C朗作為申辦大使,年收入甚至將會超過2億歐元。

為咗簽C朗,艾納斯同沙特有關方面,不但準備好超級肥約,同時亦為佢準備咗7號球衣,艾納斯原本嘅7號仔、烏茲別克國腳馬沙里波夫,已經改穿77號,就如C朗上季回歸曼聯,卡雲尼亦被迫讓出7號戰袍一樣。

至於C朗自己,一直對轉會隻字不提,日前喺IG出po,亦只係po自己做水療嘅相,另外仲有啲舉重、流汗emoji,似乎想話畀大家知佢會繼續努力Keep Fit,保持狀態。