以前阿爸話，要珍惜身邊人。當你見到佢哋一個一個咁走，你就會內疚。細個感受唔到前輩說教，人大咗就feel到佢哋講啲乜。
情況就好似意大利領隊文仙尼，12月16日，有罰球王之稱嘅米赫洛域因血癌離世，身為死黨嘅文仙尼就話痛得不能再痛。點知唔夠一個月，文仙尼再受打擊，因為由細玩到大嘅兄弟維埃里，亦因胰臟癌復發與世長辭，終年58歲。
維埃里與文仙尼識於微時，兩個都入選過意大利小國腳。去到1984年二人於森多利亞重遇，亦成功將球隊帶上高峰。先係89/90年球季，為球隊贏得舊制嘅歐洲盃賽冠軍盃。去到90/91年球季，二人協助森多利亞贏得球隊歷上首個意甲冠軍。當季維埃里入19球成為意甲神射手，而文仙尼則有11球。當時佢兩個仲被人叫做「入球雙子」，更成為森多標誌性人物。
縱然兩人之後都有唔同發展，維埃里轉投祖雲達斯以及車路士，而文仙尼則踢過拉素以及李斯特城。但都無影響過雙方友情，其中於2019年，文仙尼就力邀維埃里出任意大利國家隊團長。呢個「大總管」職位本來由一代名宿利華出任，自2013年利華退休後就一直懸空。
因為利華江湖地位崇高，所以文仙尼搵維埃里做呢個位時，都惹來唔少負面聲音。尤其當時維埃里剛啱從胰臟癌康復過來，擔心佢身體狀態較差，唔適合做呢個位。
不過做得兄弟嘅，話撐你就撐到你盡，文仙尼力排眾議力挺維埃里上場，及後意大利更贏得歐洲國家盃。亦係呢對死黨繼森多利亞之後，於足球領域所創嘅第二個高峰。
維埃里與胰臟癌拼搏多時，期間有康復過亦出現復發。於起起伏伏之下，上個月大約聖誕節之前，維埃里病情急轉直下，最終都係敵不過病魔。維埃里永遠離開大家，亦離開摯友文仙尼。仲記得以前喺記念冊裡面，最常用到嘅四個字係友誼永固。就讓呢個四字詞語長駐文仙尼心中，為兩位好兄弟維埃里以及米赫洛域嘅友情作結。
生老病死，不可逆轉。雖然你知我知單眼佬都知，但有幾多個可以平淡面對？俗語有云：改變不了環境，就改變自己心境。希望文仙尼可以抵住短期內連環傷痛打擊，盡快平伏心情去走往後嘅路。
