【聯賽盃】基利靴連環神救 VVD做英雄!利物浦險勝車仔 小將骨幹見效 高普封神!

VVD做英雄,利物浦捧盃、歡送神帥高普!冇沙拿、冇紐老師冇祖達,連龍門都係後備,搏到盡之後,換入嚟嘅全部係20歲以下青年軍小將,但唔好理,高普就係靠呢班年輕人,以1:0氣走億萬大軍車路士,助利物浦第10次捧走聯賽盃!

利物浦今場超殘陣,沙拿未能復出,連同紐尼斯、祖達、蘇保斯拉爾、阿諾特、艾利臣比加、居迪斯鍾斯等9員傷兵,一齊喺後備席睇波;正選三叉戟係艾利洛、加普及路易斯戴亞斯。

車仔同樣有唔少傷兵,但相對完整,前面彭馬、史達寧支援積遜,干拿加歷查、安素費南迪斯及卡斯度合組黃金中場。

利物浦雖然陣容極殘,但踢落同車仔拉成均勢,14分鐘,麥卡里士打同迪亞斯連環攻門,不過過唔到柏路域十指關。及後輪到紅軍門神基利靴神救,救出彭馬同積遜連環射門。

26分鐘,爭議一幕出現,卡斯度踩落加雲貝治死腳,竟然連黃牌都冇張,但加雲貝治就傷出,要由祖高美斯入替。6分鐘後,史達寧單刀建功,不過VAR就話積遜越位在先,入球無效。完半場前加普門前頭槌中柱,雙方互交白卷。

換邊後又有爭議,60分鐘,雲迪積克接應罰球頭槌建功,但VAR又介入,指處於越位位置嘅遠藤航出手掹人,影響咗球賽,入球又無效。之後車仔不乏入肉攻勢,可惜干拿加歷查先中柱、然後單刀又被基利靴救出,完場前彭馬、尼干古連環施射,又過唔到神勇嘅基利靴,球賽進入加時。

原本以為加時係板凳深度高幾班嘅車仔佔優,點知換入多名20歲以下小將嘅利物浦不落下風,去到完場前兩分鐘,雲迪積克一錘定音,今次終於冇VAR介入,利物浦以1:0險勝車路士,奪得球會史上第10個聯賽盃冠軍。