美斯世盃夢幾乎告終，佢要多謝達米安馬天尼斯，呢位維拉門神喺互射12碼階段撲出兩球，助阿根廷淘汰荷蘭，打入4強對克羅地亞，美斯決戰莫迪歷。
真正峰迴路轉，美斯一傳一射，以為勝券在握，老帥尹戈爾絕地變陣成功，法定時間最後一個攻勢追和2:2，最終要互射12碼分勝負。晉級後美斯衝向已跪地嘅達米安馬天尼斯，喺佢耳邊細語，唔係多謝仲會講乜？
信不信由你，尹戈爾賽後話為準備決賽周，已練足一年12碼，但結果荷蘭仍然繼2014年8強戰後，再次射輸畀阿根廷，
阿根廷今仗打352，集中精力搶中場，美斯、祖利安艾華利斯喺前面；荷蘭唔用番上仗對美國陣容，反而將最有威脅嘅加普拉後一格，出迪比、貝雲積打雙箭頭，上半場效果奇差，搵個似樣攻勢都冇。
阿根廷5中場效果唔錯，攻守幾平衡，上半場佔有主動，由雲迪積克領導嘅荷蘭防線，已經對美斯重重包圍，但守到35分鐘，仍然百密一疏。
前線被緊盯，美斯退後做策劃，再次顯現神跡，帶波走向左路，牽引幾個荷蘭球員，完全冇望過，突然轉線傳向右路，穿透荷蘭防線，馬體會右翼衞摩連拿後上射入。美斯呢個no look pass，越睇越有味道。
尹戈爾無厘頭出貝雲積，上半場瀨晒嘢，換邊後即將佢調走，由貝侯斯入替，64分鐘出埋盧克迪莊搏殺，但73分失多球，杜費斯犯天條，美斯主射12碼冇再甩拖，為阿根廷射成2:0，睇落大局已定。
尹戈爾出最後一招，78分鐘換入高大中鋒韋格賀斯，進行大轟炸，呢位比錫達斯球員，果然喺83分鐘頭槌破網，追成較接近紀錄。
最戲劇化場面出現於補時10分鐘，最後一個攻勢，荷蘭禁區邊得到自由球，個個以為直射，點知佢直線傳入禁區，韋格賀斯轉身射成2:2！最後關頭神操作，藝高人膽大。
進入加時，阿根廷又佔優勢，完場前連番攻門幾乎搞掂，安素費南迪斯最後一刻又射中柱。
去到互射12碼階段，雲迪積克、貝侯斯主射被馬天尼斯救出，阿根廷只有安素費南迪斯宴客，贏4:3晉級，周三凌晨3時決戰克羅地亞。
