【英超】利物浦臨尾先嚟散 0:1負水晶宮;英超年半主場不敗紀錄斷埋 曼城講多謝

真係散咗!利物浦周日英超主場對水晶宮,竟然輸0:1,繼歐霸0:3輸畀阿特蘭大後,28場英超主場不敗紀錄亦告終結,爭奪聯賽冠軍嘅希望,亦好大機會因為呢場敗仗而幻滅。

曼城前一日以5:1輕取盧頓,32戰73分升榜首,利物浦同場數71分,阿仙奴打少場亦係71分。以曼城近況,掃晒餘下6場機會樂觀,依家應該係睇阿仙奴仲有冇得追,但阿仙奴同利物浦餘下對手,相對較曼城難踢好多。

利物浦之前兩仗,分別英超作客和曼聯2:2、歐霸盃8強首回合主場吞阿特蘭大3蛋,令人擔心佢哋係咪季尾轉趨力弱,未能為高普帶嚟一個完美結局。果然佢哋連續兩場主場,喺零入球情況下輸波。

已經係強陣,居迪斯鍾斯同艾利臣比加亦傷愈復出做正選,但防線真係漏洞百出,13分鐘成班後衛睇波,被伊斯輕易近門射入,令紅軍連續9次主場有失波。

18分鐘輪到雲迪積克跣腳,畀水晶宮單刀機會,艾利臣比加出迎亦投降,全靠羅拔臣死追,喺白界線上解圍,先唔駛輸至0:2。

之後利物浦展開狂攻mode,但又係射極唔入,遠藤航中楣,水晶宮門將軒達臣又屢救險球,利物浦上半場落後0:1。

下半場利物浦換入蘇保斯拉爾、阿歷山大阿諾特、迪亞高祖達、加普,乜進攻架生都出齊,但迪亞高祖達近射被救空門,居迪斯鍾斯單刀面對門將又射斜,沙拿近射睇怕必入又被閂出,失咁多機會,註定利物浦英超主場不敗走勢終結。

依家落後曼城2分,剩番6場,順序作客富咸、作客愛華頓、作客韋斯咸、主場對熱刺、作客維拉,主場對狼隊,有冇得反cup,機會唔係冇,難啲咯。