【英超】利物浦作客1:1和曼城 阿諾做英雄 高普收晒貨;夏蘭特士哥又破紀錄

「唔該收聲!」雖然被扭到失魂,但利物浦右閘阿歷山大阿諾尾段射入扳平球,令利物浦於劣勢下,作客1:1迫和曼城,而阿諾亦作出收聲手勢,總算一吐烏氣。

曼城賽前28分居榜首,領先次席利物浦1分。擺出3-4-2-1陣式嘅曼城,雙防中文路爾艾簡治、洛迪,加上科頓、杜古、貝拿度施華、祖利安艾華利斯,發揮強大效率,中場佔優,輾壓紅軍。曼城上半場佔6成控球,射門5:2,其中4次中目標。特別針對利物浦右閘阿諾,扭波王杜古多次進襲,製造危機。

杜古多次製造威脅。

27分鐘出現入球,利物浦門將艾利臣比加開出嘅龍門球乏力,曼城中堅尼敦阿基截得後,連過兩人後放靚波,艾寧夏蘭特大禁區內射遠柱網仔,令艾利臣比加鞭長莫及,挪威神鋒斬獲今季第14個英超入球之餘,亦只用咗48場,就達成英超50球大關,打破英超紀錄,之前紀錄係曼聯射手高爾(53場) 。

利物浦下半場企圖反攻,令後半場露出更多空位,曼城食住上大打快攻,經常有人多打人少情況,特別係杜古,喺左路面對阿諾幾乎話過就過。

但未能拉開紀錄,面對利物浦呢種高質球隊,始終會有危機。曼城攻極唔入,到80分鐘,竟然畀阿諾一個中距離射門扳平。真係乜仇都報晒,難怪阿諾入波後,要出叫人收聲手勢祝捷。

賽後高普受訪,似暗示曼城發揮一般,可惜利物浦亦未有驚喜發揮:「如果今日真係踢得好好的話,我哋應該可以贏波,但可惜冇。我哋表現都ok嘅,至少為佢哋帶來問題。」