【英超】作客曼聯永遠難搞!利物浦28次攻門 只靠12碼追和2:2 高普起火狂炳球員

又衰喺曼聯手上!利物浦周日英超作客奧脫福,全場圍攻下佔盡優勢,但結果只能憑比賽末段一個12碼,2:2迫和宿敵曼聯,利物浦失分後,令今季冠軍之爭更加緊湊。

阿仙奴、曼城前一日都贏波,目前榜首形勢,阿仙奴同利物浦都係71分,阿仙奴得失球差領先9球,第3位曼城70分。3隊都剩番7場,當中利記仲要對熱刺同維拉。

曼聯繼足總盃後,幾乎再次喺主場搞死利記,其實亦無需意外,佢哋無論之前打得幾差、成績幾劣都好,只要主場踢雙紅會,無論表現同鬥志,都會顯露番紅魔魂。

如果齋睇上半場,基本上完全冇得踢,利物浦作客贏晒,除開波1分鐘加拿祖單刀食詐胡外,曼聯係零射門,調轉畀利物浦練靶咁練,蘇保斯拉爾、沙拿連番攻門,唔係自己射失,就係被奧拿拿救出。

上半場唯一入入球23分鐘出現,達雲紐尼斯頭槌二傳,路易斯迪亞斯近門射入,完成南美連線,達雲今季第13次助攻,亦係英超第一名。

利物浦攻極都入唔到燕梳球,喺50分鐘送大禮,中堅昆沙橫傳嚴重失誤,般奴費南迪斯亦醒到無倫,見龍門基利靴企出禁區,喺中圈第一時間大腳直射,曼聯絕境翻生,追和1:1。

上次主場對利記,曼聯又係劣勢下反勝晉級,今仗追和後個勢唔同晒,年輕中場明奈67分鐘又顯示超新星功架,射入靚波令曼聯後來居上。

高普見咁好形勢,竟然又再落後,喺明奈入波後,喺場邊發晒火,手口並用狂炳球員。直至84分鐘,佢先可以定番啲,雲比沙卡魯莽剷跌艾利洛,被罰12碼,沙拿主射得手,追和2:2完場。

睇番數據,曼聯全場5次射門有2入球,利物浦射足28次先有2球,紅軍今季攻勢超多,但轉化入球比率相對偏低,所以經常贏得辛苦,同沙拿、文尼、法明奴組合時代相比,的確有所不如。