世界盃F組最後一輪賽事，榜首克羅地亞對比利時。另外已出局嘅加拿大對摩洛哥。除加拿大之外，其餘3隊都有機會爭出線資格。「克」及「摩」同得4分，形勢上好少少，打和都有機會。比利時有3分兼得失球-1，唔贏就出局。(今晚11時)
先講克羅地亞對比利時，前者係上屆世盃亞軍，後者為季軍。睇落好似幾勁，但4年之後雙方都有多少滑落，尤其係比利時。比利時頭場贏加拿大，運氣成份相當之高。次輪對摩洛哥就無咁好彩，成班波谷極都谷唔起，最終輸0比2。最近仲傳出球員有內訌，士氣曳又無活力，去到尾輪賽事都無謂憧憬。
相反，克羅地亞班波係老，但踢落仲有心有力。老大哥莫迪歷更加唔錫力，喺國家隊助攻助守，成日都見佢返後協防，有幾腳真係忍唔住大嗌好波。有時踢波除咗講質素，鬥心同拼勁好重要，今屆賽事已出現唔少例子。讓球方面開平手，捧仲有啖火嘅克羅地亞。
至於加拿大對摩洛哥，正路都揀返後者。記得抽籤分組之後，個個都睇死摩洛哥唔掂，但班波以行動話畀你聽你哋睇錯。之前兩場對克羅地亞及比利時都保持不敗，照計對住實力弱少少嘅加拿大應該無問題。加拿大已經出局，爭勝心減低都好正常。
再講，4年之後加拿大係主辦國之一，點都要畀班後備球員落場儲吓level，希望下屆踢得好好睇睇。形勢上摩洛哥較為優勝，揀個齋W合情合理，暫時有1.71倍。
