【世盃賽後】麥麥送頂住要讚！英格蘭0:0悶和美國 出線穩陣 各界照鬧爆悶蛋修夫基

第一場大勝只係假象？周六凌晨B組賽事，英格蘭陷於苦戰，同美國打和0:0，不致全失3分，麥佳亞係主要功臣，真係要再畀credit麥麥送。

由於同組另一仗伊朗2:0贏威爾斯，最後一輪分組賽前，4隊都仲有出線機會。英格蘭目前4分，伊朗3分，美國2分，威爾斯1分。形勢上英格蘭最有利，因為先計得失球，對威爾斯輸少過4球即可晉身16強，美國對伊朗就肯定係世死戰。

首仗大勝伊朗6:2，英格蘭表現備受讚賞，但面對今屆決賽周平均年齡第二細、只有25.8歲嘅美國，用番同一班人，卻處處受制，特別係中前場線，完全交唔出水準，欠缺有威脅攻門。

最差係史達寧，全場存在感近乎零，哈利卡尼亦被美國後衛成功箝制，連上仗光芒四射嘅祖迪比寧咸，因對手有出色快速推進同壓迫，只能集中防務，未能參與進攻。較有威脅反而係左後衞勞基梳爾邊線進攻，以及麥佳亞死球助攻。

美國雖然年輕，但連續兩仗有板有眼，成班後生仔可以經受世界大賽考驗。上仗射破威爾斯嘅前鋒添莫菲摩亞獲爸爸、前AC米蘭巨星韋亞入場打氣，表現更加落力。

計埋門入肉程度，美國更勝一籌，隊長普列錫上半場曾勁射中楣。下半場中段開始，更發動猛烈大攻勢，但麥佳亞打起番信心，多次清脆瓦解對手攻勢，同肥梳都係表現最佳英格蘭球員，冇辜負領隊修夫基信任。

雖然唔駛輸，但修夫基作風保守，再受到嚴厲批評。正選攻擊手冇料到之時，冇換入哥連威爾遜、菲爾科頓等前鋒，扭轉被圍攻局面，又踢番悶到飛起嘅波，現場好多英格蘭球迷，散場後不斷柴台，噓聲四起。

好多名宿批評修夫基，名將奧雲表示：「英格蘭用咗14個球員，但最好波嗰個菲爾科頓喺後備！」86年世盃神射手連尼加就咁插：「英格蘭有好多勁人，成功關鍵係個領隊點換人。」

對於球迷狂噓，修夫基賽後回應：「球迷噓咩？我唔肯定佢哋目標係咪英格蘭，個人嚟講我滿意球員表現，美國係好難應付嘅對手。」

美國全隊跑動能力強，中場攔截能力突出，特別兩名防中，列斯聯泰拿阿當斯、華倫西亞尤路斯穆沙，效率超高；可惜係前鋒入球把握力不足，呢方面同伊朗相比最輸蝕，有可能係勝負關鍵。