【世盃賽後】美斯12碼宴客 無阻阿根廷晉級鬥澳洲；波蘭符碌出線 要多謝沙特戰鬥到底！

波蘭幸運入16強，多謝沙特阿拉伯！C組最後一輪，波蘭雖然0:2負阿根廷，但墨西哥狂攻之下，只能以2:1挫沙特，令波蘭以一個得分球差優勢晉級。

阿根廷最後以6分首名出線，波蘭4分淨勝球0，墨西哥同得4分，但淨勝球負1，成為出局一方。沙特上仗0:2負波蘭，今仗卻死頂唔輸第3球，臨尾仲整番球隊冧墨西哥，的確要向呢兩支戰至最後一秒嘅雄師致敬。

未開波前，C組波蘭4分領先，阿根廷、沙特阿拉伯3分，墨西哥1分，4隊都有出線機會。

為攞3分穩陣出線，阿根廷出全攻陣勢，出「新阿古路」祖利安艾華利斯，同美斯、迪馬利亞合作攻堅，「新華朗」安素費南迪斯亦做正選，擔任攻擊中場。

波蘭和都出線，自然打守勢波，阿根廷大舉進攻，美斯表現都好活躍，39分鐘頭槌攻門時，畀出迎門將施捷斯尼打中塊面，搏得12碼，美斯主射，但被施捷斯尼捉到路撲出。

波蘭後衞上半場仲頂得住，但換邊後唔夠1分鐘，未企穩陣腳即閃電失守，白禮頓中場阿歴斯麥阿里士打，突然入楔禁區，無人看管下第一時間射遠柱，施捷斯尼鞭長莫及。67分鐘，祖利安艾華利斯將紀錄改寫成2:0。

阿根廷領先兩球後放慢攻勢，波蘭亦欠反攻意欲，因為形勢上，最緊要唔好再失球，出線仲有價講，如果另一場沙特和或輸，墨西哥唔係淨贏3球，仍然可以晉級。雖然好驚險，但又真係畀佢哋搏到。

墨西哥拼死求勝，壓住沙特狂攻，墨西哥喺47、52分鐘入波，由於佢哋黃牌數目較多，一定要入多球、又或者波蘭失多球先可以出線，但墨西哥之後攻勢雖然猛烈，又食詐胡兼被救空門，但就係始終冇辦法再入波，極度慘情。

沙特後防雖然散散哋，但夠晒體育精神，拼到最後一秒，並喺補時階段射成1:2，粉碎對手出線希望，墨西哥決賽周必入16強優良傳統，到此亦告終結。

阿根廷首名，周日凌晨3時對澳洲，而波蘭僥倖入16強，周日晚上11時對大熱門法國，恐怕會行人止步。