【世盃賽後】9人輪換創紀錄 巴西負喀麥隆 分組賽冇全勝球隊；瑞士晉級 16強出籠 最想睇邊場？

決賽周分組賽全部完成，巴西喺篤定晉級情況下，作出9人大輪換，結果0:1負喀麥隆，但仍然首名出線，16強會對南韓。瑞士亦搭上尾班車，佢哋以3:2反勝塞爾維亞。

法國、葡萄牙、巴西，都屬於有機會3戰3勝球隊，但佢哋喺早已拎到16強資格後，尾輪收起好多主力，令今屆8個分組，連一支全勝球隊都冇。

出線球隊當中，歐洲佔半壁江山，共佔8隊。亞洲區球隊令人振奮，日本、澳洲、南韓3隊過關，更勝南美洲（2隊）、非洲（2球）及中北美洲（1球）。今次亞洲球隊全面冒升，沙特阿拉伯即使出局，都曾爆冷挫阿根廷，伊朗亦擊敗過威爾斯，只有主辦國卡塔爾最令人失望。

巴西16強對南韓，班主力肯定抖夠，因為佢哋對喀麥隆，同上仗對瑞士比較，作出9個輪換，破自1966年以來最高紀錄，當屆同樣輪換9位球員嘅球隊，正正又係巴西。對南韓嗰陣可以出番班主力，又有尼馬復出，仲有冇冷爆先？

其實今仗正選，如安東尼、加比爾馬天尼利等人，都有唔錯表現，製造好多機會，但最後一腳唔夠火喉，反而畀喀麥隆嘅阿布巴卡補時入波。

巴西如果贏南韓，8強會對日本或克羅地亞，同線勁敵有荷蘭、阿根廷。另一條線，爭標份子主要係法國，若淘汰法國，好大機會鬥英格蘭，葡萄牙、西班牙都係呢條線。

16強接住今晚就展開，跟開波時間順序，邊場波你一定會睇？