【英超】一返聯賽即化龍!阿仙奴4:1炒紐記 唔只6連勝 得25失3冠絕同期

歐聯一條蟲,英超一條龍!阿仙奴周日凌晨主場對紐卡素,又以4:1大勝對手,令榜首形勢更加緊湊。

周中歐聯16強首回合,阿仙奴作客波圖除咗輸0:1,全場更冇一次中目標嘅攻門,但返到英超,兵工廠即脫胎換骨,連同今仗已6連勝,加埋入25球只失3球嘅紀錄,再次加入爭標行列,絕對係理所當然。

目前榜首形勢超緊湊,榜首3強都係26戰,利物浦60分;曼城1:0險勝般尼茅夫,有59分;阿仙奴58分排第3,構成近年英超少見嘅混亂場面。其實阿士東維排第4,亦唔算落後好多,呢支超級黑馬26戰52分。

阿仙奴今場對紐卡素,賽前有個驚喜,前利物浦門將卡列斯奧為紐卡素出任正選。上半場初段,兵工廠攻勢已浪接浪,18分鐘,薩卡開角球,加比爾頭槌導致門前混亂,球證示意入球已越過白界,原來喜鵲守將保治文擺烏龍。

開紀錄後唔夠5分鐘,馬天尼利殺落右路沉底,傳中畀夏維斯撞入,兵工廠拉開到2:0。下半場,喜鵲依然捱打,65分鐘,薩卡右路再次發難,冷靜射遠柱得手,拋離到3:0。

70分鐘,基維奧接應迪勤懷斯角球,近門頂入,完場前6分鐘,紐卡素由倒戈嘅中場韋歷克破蛋,總算挽回少許面子。