曼城力量橫行U21歐國盃！尋晚兩場4強大戰，彭馬同沙治奧高美斯各有士哥，表現同樣出色，分別帶領英格蘭同西班牙闖入決賽，兩大傳統強國對壘，合演夢幻戲碼。
以色列足球近年極速冒起，上年U19歐國盃拎亞軍，今年世青拎季軍，而今屆U21亦殺入4強，可惜面對質素超晒班嘅英格蘭，仍然要慘吞3蛋。
英格蘭今場波用番路維仔踢正選，拍哥頓、傑斯韋治攻堅，13分鐘以為有好開始，哥頓博到12碼，不過傑斯韋治主射卻擦柱出界。戰至完半場前，英格蘭終於搵到缺口，高爾彭馬傳中，傑斯韋治將功補過搞掂。
下半場，又係彭馬，佢喺64分鐘接應路維仔傳送撞入，英格蘭領先2:0，大局已定下，英格蘭踢番最擅長嘅傳控，直到90分鐘，彭馬再助攻艾查亞埋齋，3:0完場。
英格蘭今屆5戰全勝，仲要係一球不失，表現極具霸氣，正選門神查福特亦應記一功，佢亦係曼城球員，不過喺球會上陣機會唔多，哥迪奧拿亦無意阻佢發展，新季有傳會將佢外借由徒弟甘賓尼執教嘅般尼。
曼城亦另一位新星沙治奧高美斯亦有料到，佢帶領西班牙以5:1炒起烏克蘭，強勢殺入決賽。
烏克蘭今屆都有驚喜，又有梅迪歷助陣，分組賽仲曾經以2:2賽和西班牙，令唔少球迷對佢哋有憧憬。開波13分鐘，梅迪歷巧妙落底傳中，邦達蘭高完成任務，烏克蘭領先1:0。
不過西班牙好快站穩陣腳，艾比雷斯先入波扳平，之後辛錫撞射得手，西班牙反超2:1。領先後嘅西班牙睇住嚟攻，安東尼奧白蘭高、奧路斯及沙治奧高美斯之後各入一粒，西班牙大勝5:1，殺入決賽鬥英格蘭。
沙治奧高美斯喺曼城多數踢左閘，不過嚟到國家隊就踢左翼，表現一樣咁出色，呢位左路達人，新季喺曼城大把世界。
U21歐國盃決賽，將會喺香港時間周日凌晨零時開波。
