今個星期無歐洲賽事舉行，換言之就係盃賽為主。其中德國盃第二圈賽事，史特加主場鬥柏林聯，後者近期輸慌失失，球員好似方寸大亂，就算去到比賽壓力無咁大嘅德國盃，現階段都好難睇好。史特加今季穩定穩紮，主W有1.61倍抵博。(11月1日凌晨1時正)
柏林聯今季有份打歐聯，或多或少會令人憧憬。但現實說明唔係乜隊都可以勝任高水平賽事。柏林聯於歐聯可謂完全唔夠班，亦因為人腳唔夠充裕，柏林聯跌入虛耗性旋渦當中。球員體力急劇下滑，搞到聯賽同歐戰都踢得唔好。由9月份至今，柏林聯於德甲及歐聯錄得10連敗劣績。依家球隊最需要係休息，而並非於本土盃賽繼續打拼。
至於史特加，現於德甲排第3，表現有板有眼。球隊於10日前就同柏林聯於聯賽交過手，當時史特加作客大勝對手3比0。如今轉到去盃賽，史特加有番主場之利，形勢更見上風。面對體力及士氣都處於低位嘅對手，史特加贏波「依絲執」。
同時間開波仲有禾夫斯堡對RB萊比錫，客隊近期弗到漏，近3次對賽仲贏晒，呢場有免費台直播，啱心水而又想刺激啲，客軍讓半一嘅上盤都博得過。
去到11月1日朝早，墨西哥方面有幾賽事舉行。早上9點正有托盧卡主場對普埃布拉。托盧卡近期主場幾惡，已經累積6場不敗。而近2次主場分別對聖路易斯體育會以及克雷塔羅都贏波，今周對住下游球隊普埃布拉都應該無走雞。讓球主讓一球/球半，可揀上盤。
另外早上11點有利昂主場對普馬斯，雙方近年對賽都踢得幾激烈，已經連續4次對賽開大。信數據，今場大細中位數2.5球揀「大」。
史特加 勝 1.61倍
托盧卡 上盤 1.95倍
利昂 大 1.61倍
