星期一凌晨去到朝早都有唔少投注選擇，當中King Sir睇中意甲及墨超。意甲係國際米蘭主場鬥羅馬，另外朝早兩場墨超，包括拿根亞主場對祖亞雷斯、迪祖亞拿主場對阿特拿斯。
國際米蘭主場對羅馬，本來其中一個話題係羅馬教練摩連奴重返聖西路球場，不過串王上周聯賽贏波後扮喊，被球證以挑釁為由趕離場，今周唯有遙距督師。
無論摩佬身在何處，相信羅馬都一樣有競爭力，絕對有能力喺藍黑兵團身上取分。留意羅馬於10月份所有賽事全部贏晒，當中包括意甲以及歐霸盃。今周倒戈相向嘅前鋒盧卡古亦越踢越弗，近期佢仲賣口乖話係摩佬令佢重生，認真襟撈。憑盧古卡強大衝擊力，可以攻破國米防線。
國米雖然近5場都保持不敗，但說服力不足。10月7日主場以2比2與博洛尼亞打和，以及剛於歐聯主場對薩爾斯堡小勝2比1，演出都畀唔到人信心。今次遇到羅馬，國米未必讓得起，羅馬受讓一球揀「下盤」。
朝早就到去中美洲墨西哥，9點05分先有拿根亞，面對客軍祖亞雷斯。呢支拿根亞都幾夠「吉士」，上輪聯賽鬥榜首CF阿美利加大打進攻足球，結果輸3比4，典型跌3分贏掌聲。查實拿根亞向來踢法性感，有前無後打死罷就，今輪對住祖亞雷斯都唔例外，一於捧中位數2.5球嘅「大盤」。
守尾門迪祖亞拿主場對阿特拿斯，迪祖亞拿最近兩連敗，表面睇唔理想，但上述兩場都係作客，今次返主場迎敵，成個形勢就唔同晒，有望將聯賽主場連勝紀錄增加至4場。阿特拿斯踢法死板唔識變通，係唔會犯大錯，但亦唔會有乜大突破。迪祖亞拿可秤高多少，捧主勝。
