意甲榜首球隊拿玻里，本輪聯賽作客萊切。上次拿玻里於主場以0比4不敵AC米蘭，賽果都幾令人意外。經過教訓之後，相信拿玻里唔會咁大意。而且班波每逢歐聯前都特別醒神，對住士氣低落嘅萊切應該無難度，捧「客勝」。
拿玻里今季可謂大爆發，唔單止好有機會贏得意甲冠軍，歐聯亦都殺到入8強，下周中就會對AC米蘭。雖然有歐聯跟尾，但對拿玻里無乜影響，事關今季拿玻里於歐聯前嘅比賽全部贏哂。至於對手萊切近況都幾差，連續5場全敗兼無入球。遇到強隊拿玻里，相信都幾難翻身。
講到榜首球隊，葡超榜首賓菲加主場鬥波圖。今季賓菲加狀態長期見勇，如無意外聯賽冠軍都係佢哋囊中物。前鋒干沙路拉莫斯於世界盃表現有幾好唔使多講，今季仲有機會爭神射手。今次面對敵對球隊波圖一定使出十成功力。賓菲加攻力有保證，捧「主勝」。
較後時間仲有意甲，由AC米蘭主場對安玻里。之前已經提及過，AC米蘭最近就以4球爭勝拿玻里，成班球員弗到震。尤其係前鋒拉菲爾利亞奧，雖然踢法幾獨食，但入波的話又吹佢唔脹。安玻里質素一般，近幾次對住AC米蘭都係落敗居多。今場AC米蘭讓一球/球半，照捧「上盤」。
