決賽周進入最後白熱化階段，殘酷淘汰賽，令巴西與英格蘭兩大熱門提前出局，C朗亦世界盃冠軍夢碎。
最後四強，阿根廷、克羅地亞、法國、摩洛哥，目前仍有機會喺今個周日晚上，於卡塔爾捧起冠軍獎盃。
阿根廷對克羅地亞，法國對摩洛哥，相信係決賽周前難以想像嘅4強戲碼。無論結果如何，以下四個可能結局，將會成為扣人心弦嘅經典故事。
1.球王美斯終圓夢？
美斯「最後探戈」，足球生涯已經幾乎贏盡一切榮譽：10次西甲冠軍、1次法甲冠軍、4次歐聯冠軍、2021年美洲盃冠軍，保持7次獲「金球獎」（Ballon d’Or）嘅紀錄。
已經35歲，仲有一個至高榮譽從未染指，世界盃係佢同比利、馬納當拿等史上最偉大球王唯一差距。
阿根廷距離上一次奪得世界盃，已經過去了36年－當時由馬納當拿領銜；美斯2014年無比接近，可惜阿根廷決賽不敵德國，屈居亞軍。
今次能否為足球生涯寫下一個完美結局，奠定歷史地位？將會係本屆世界盃最引人入勝的劇情之一。美斯同阿根廷，周三凌晨需要先過克羅地亞一關。
2.克羅地亞不老英雄
克羅地亞時隔四年，又一次闖入四強，而且保持無與倫比嘅頑強鬥志。
四年前，連續喺12碼大戰淘汰丹麥、俄羅斯，4強又通過加時擊敗英格蘭，成功殺入決賽。今屆亦已經連續兩次互射12碼，淘汰日本同巴西。
克羅地亞上一次喺90分鐘之內贏得世界盃淘汰賽勝仗，已經係24年前，1998年世界盃八強戰以3比0擊敗德國。
克羅地亞今屆能夠殺入4強更難能可貴，因為中場大師莫迪歷，已經37歲。雖然老將已經過兩場加時，但佢嘅靭力及鬥志，仍然無可置疑。阿根廷曾經喺2018年分組賽以0比3不敵克羅地亞，佢哋應該好清楚，呢個對手究竟有幾厲害。
3.非洲奇跡再走幾遠？
摩洛哥來自北非，歷史上第一支殺入4強嘅非洲球隊，剩低問題，會唔會有終極奇跡？
陣中有經驗豐富嘅球星，比如車路士翼鋒薛耶治、巴黎聖日耳門右翼衛阿舒拉夫，但係「阿特拉斯雄獅」能夠打入4強，仍然出人意表。
分組賽力壓克羅地亞、比利時以首名出線，淘汰賽連贏西班牙、葡萄牙。摩洛哥之成功，建立於固若金湯嘅防守，以及無與倫比效率之上。到目前為止，仲未有對手球員曾攻破過摩洛哥大門，目前唯一失球係對加拿大時嘅烏龍波。
另一方面，佢哋有最狂熱支持者。世界盃主辦國卡塔爾之前講過，今屆世界盃唔止係卡塔爾主場，亦係整個中東地區同穆斯林群體主場。周四凌晨對法國，佢哋能唔能夠再次狂歡？
4.法國冧莊之難度
法國正努力完成一個使命，自1962年嘅巴西之後，未有球隊可以衞冕。事實上，近年來衛冕冠軍征途總係異常艱難。過去12年，意大利、西班牙和德國隊都喺分組賽出局，而法國已經喺卡塔爾打破呢個魔咒。
8強戰勝英格蘭，令法國成為繼1998年巴西之後，第一支入4強嘅衛冕冠軍。被問到可唔可以連續兩屆闖入決賽，法國領隊迪甘斯咁樣回答：「你哋諗得太早喇！」
