【非國盃】利物浦噩耗!埃及2:2逼和加納 沙拿忍淚傷出 或緣盡非國盃

沙拿傷出、利物浦噩耗!今晨非國盃B組賽事,埃及幾經辛苦逼和加納2:2,但代價非常沉重,王牌前鋒沙拿喺比賽期間受傷,喺隊友安慰下忍淚被換離場,好大機會緣盡今屆賽事。

埃及首仗失分,今仗為爭出線不容再失,但踢到上半場尾段,沙拿喺衝刺一輪後突然停低,撳住左腳大脾,軍醫入場治療後,沙拿被逼退下火線,離場嗰陣更情緒激動,要隊友安撫。

就喺沙拿離場後,加納就由效力韋斯咸嘅古達斯入波,領先1:0。下半場埃及反撲,馬莫殊68分鐘追平,但開心咗唔夠4分鐘,古達斯梅開二度幫加納再次領先,好彩3分鐘後,埃及憑穆斯塔法扳平2:2完場。

埃及教練域多利亞賽話:「希望佢傷勢冇咩大礙啦,依家我仲未知詳細情況,不過我估計應該唔會太嚴重,當然,一切都要等檢查結果,先可以確認佢嚟緊踢唔踢得。」

沙拿疑似拉傷左腳大腿,一般呢啲case由最輕微嘅一周到最嚴重嘅兩個月不等。今次沙拿受傷,唔單止打擊埃及出線以至爭標機會,更影響埋利物浦部署,事關呢位王牌今季幫利記27次披甲,入18球另加9次助攻,兩項數據都係英超第一。

至於埃及就會喺分組賽最後一戰對榜首佛得角,沙拿應該難以落場,而非國盃決賽則喺2月11號舉行,如果埃及一路晉級,但沙拿就受傷而回,對利物浦嚟講,可以話係最差嘅結局。