今季第一次雙紅會，今晚深夜3點上演，曼聯主場對利物浦，兩軍將會爭今季首勝。去年5月，曼聯球迷喺雙紅會前抗議格拉沙家族、實行佔領行動，導致比賽延期。高普賽前表示，唔想同樣事件再次發生，強調如果再因曼迷示威而導致今仗延期，英超官方應直接判利物浦勝出。
曼聯開季2連敗，紅魔球迷憤怒到極，大約有1000名球迷，蘊釀再搞對抗班主格拉沙行動，揀正對死敵利物浦時舉行。上次事件，曼聯並冇受罰，賽事只係延期舉行，高普認為處理不當，對紅軍好唔公平。
「唔希望再出現同樣情況，若歷史重演，應判利物浦得3分，我哋作為客軍，做足準備工夫，出現呢種情況，同利物浦完全無關。」高普強調，11月世界盃開打前，利物浦要踢25場比賽，已經極度密集，唔應該再被拖延。
高普做利物浦領隊後，宿敵曼聯已換過6任主帥：「每個領隊風格都唔同，例如尹戈爾、摩連奴完全係兩套波。所以利物浦必須做不同準備。如果足球戰術總係一成不變，就唔駛我坐低做領隊喇！」
對手領隊坦哈格壓力山大，踢咗兩場聯賽，已成被炒主帥熱門，作為同行，高普會唔會有同情之心？佢斬釘截鐵話：「冇必要同情坦哈格。足球永遠充滿問題，利物浦亦有大量傷兵。足球世界如同海洋，裏面充滿鯊魚，同情對手唔會為佢哋帶來幫助或者傷害，因為每人都有自己難題，世情如是。」
周一深夜若然勝出，高普將成為侯利亞之後，首位連續3次作客擊敗曼聯嘅利物浦領隊。對坦哈格嚟講，佢亦唔需要高普同情，最重要係得到分數，1分都好，若然再輸甚或大敗，情況將更不堪設想。
