一年容易又到金球獎，今晨大會公佈30人候選名單，轉戰沙特聯賽嘅葡萄牙巨星C朗榜上無名，係呢位前鋒出道20年來，第一次冇份被提名候選。
講到大戶，好自然就係英超，呢個全球最受注目嘅聯賽，一共有12人上榜，至於英超、歐聯、足總盃3冠王曼城，就佔咗當中7席，分別有艾寧夏蘭特、奇雲迪布尼、洛迪、貝拿度施華、魯賓戴亞斯、祖利安艾華利斯，同埋新兵加華度爾。
由於舊年冬天美斯拎咗世界盃，被睇好會再次封王。美斯同C朗雄霸球壇十幾年，及至近年，美斯喺金球獎已經領先，近4屆兩次封王，而C朗對上一次拎金球獎係2017年。嚟到今年，喺世界盃後轉投艾納斯嘅C朗，自2003年後首次連候選名單都冇份。
至於耶辛獎（最佳守門員），幾位喺世界盃表現出色嘅門將都有入選，包括摩洛哥嘅保奴、克羅地亞利華高域、巴西艾達臣摩拉斯、法國緬朗、當然唔少得大熱門馬天尼斯。
KOPA獎（最佳U21球員）嘅10人候選亦已出爐，喺皇馬同世界盃踢到曉飛嘅祖迪比寧咸係大熱，另外仲有穆斯亞拿、巴塞孖寶加維、柏迪、曼聯新兵海倫、皇馬嘅法國球星卡馬雲加等等。
金球獎30人侯選名單：
賓施馬(伊蒂哈德) 🇫🇷
加華度爾(曼城) 🇭🇷
穆斯亞拿(拜仁慕尼黑) 🇩🇪
奧拿拿(曼聯) 🇨🇲
穆罕默德沙拿(利物浦) 🇪🇬
高路梅安尼(巴黎聖日耳門) 🇫🇷
祖迪比寧咸(皇家馬德里) 🏴
奇雲迪布尼(曼城) 🇧🇪
貝拿度施華(曼城) 🇵🇹
布卡約沙卡(阿仙奴) 🏴
基華拉斯基利亞(拿玻里) 🇬🇪
馬天尼斯(阿士東維拉) 🇦🇷
夏蘭特(曼城) 🇳🇴
尼高巴列拿(國際米蘭) 🇮🇹
魯賓戴亞斯(曼城) 🇵🇹
奧迪加特(阿仙奴)🇳🇴
根度簡(巴塞隆拿) 🇩🇪
祖利安艾華利斯(曼城) 🇦🇷
耶辛尼保奴(希拉爾) 🇲🇦
雲尼斯奧斯祖利亞(皇家馬德里) 🇧🇷
羅拔利雲度夫斯基(巴塞隆拿) 🇵🇱
基沙文(馬德里體育會) 🇫🇷
拿達路馬天尼斯(國際米蘭) 🇦🇷
美斯(國際邁亞密) 🇦🇷
洛迪(曼城) 🇪🇸
奧森漢(拿玻里) 🇳🇬
麥巴比(巴黎聖日耳門) 🇫🇷
金玟哉(拜仁慕尼黑) 🇰🇷
摩迪(皇家馬德里) 🇭🇷
哈利卡尼(拜仁慕尼黑) 🏴
