阿根廷球王美斯再創歷史，以大熱門姿勢第8度贏得金球獎。以往同佢長期競爭奬項嘅C朗，已經退出呢個戰場，非官方網上資料顯示，佢今次選舉排名為829。
頒獎典禮周一喺巴黎舉行，經過170名記者投票，36歲兼已離開歐洲球壇嘅美斯，憑世界盃冠軍榮譽，力壓入球機器夏蘭特、紀錄性第8次奪得金球獎。
美斯自2009年首奪金球獎後，14年來經歷無數輝煌嘅故事，寫下一幕幕經典。由巴塞MSN王朝、世盃飲恨、到首奪美洲國家盃、出走巴塞、再捧走世盃、進軍美職……已屆36歲美斯，極可能係最後一次拎金球獎。
過去呢一年，絕對係美斯大豐收嘅一年，幫巴黎聖日耳門贏法甲冠軍、帶領阿根廷喺卡塔爾捧走世界盃，助國際邁亞密封王北美聯賽盃，加上佢喺世界盃決賽周射入7球，自然大熱當選，並喺國際邁亞密班主、英格蘭名將碧咸手上接過金球獎獎座。
「返到嚟呢度（巴黎）享受呢一切一切，真係太美好。捧世界盃，實現咗我嘅夢想，我冇諗過自己會有咁輝煌嘅足球生涯，我慶幸自己身處足球史上其中一支最佳球隊。」主持人杜奧巴問，今次係咪格外特別，美斯笑謂：「每一次都咁特別。」
過去15屆金球獎選舉，有13屆落喺美斯同C朗手上，如今C朗已淡出歐洲球壇，而美斯亦極有可能係最後一屆，嚟緊會到邊個？睇番第2到第5位順序，大概都可略知一二，順序為夏蘭特、麥巴比、奇雲迪布尼、洛迪。
美斯深明今次攞獎係因為世界盃加持，佢亦大方欽點未來金球人選：「夏蘭特好有資格得獎，除咗三冠，佢仲贏埋英超、歐聯同所有神射手嘅獎項，我肯定未來幾年，佢一定會攞獎。」
最後致詞時，美斯更向已故阿根廷球王馬納當拿致敬：「最後，我想多謝馬納當拿。今日係你嘅生忌(10月30日)，我想同你分享呢個殊榮。」
除咗美斯眾望所歸，最佳U21球員高柏獎，亦由超級大熱門、皇家馬德里中場比寧咸當選。比寧咸今季轉戰西甲後飛龍在天，如果繼續保持，隨時下屆金球獎，就係由佢挑戰夏蘭特、麥巴比，成就三王鼎立之局。
男子金球獎前5名
1 美斯
2 夏蘭特
3 麥巴比
4 奇雲迪布尼
5 洛迪
2023年金球獎得獎名單
金球獎：美斯（國際邁阿密、阿根廷）
高柏獎（最佳U21球員）：比寧咸（皇家馬德里、英格蘭）
耶辛獎（最佳門將）：馬天尼斯（阿士東維拉、阿根廷）
梅拿獎（單季入球最多）：艾寧夏蘭特（曼城、挪威）
最佳球隊：曼城
蘇古迪斯獎（表彰人道主義工作）：雲尼素斯（皇家馬德里、巴西）
女子金球獎：艾坦娜（巴塞隆拿女足、西班牙女足）
最佳女足球隊：巴塞隆拿女足
