負面新聞一大籮，包括早年與列貝利同嫖雛妓、涉及性愛錄影帶勒索案、涉洗黑錢等等，由慘遭國家隊掃出門，到成為金球獎得主……34歲法國天王賓施馬，坦言旅程艱辛，能修成正果，全因保持一團火。
《法國足球》雜誌主辦，金球奬頒獎典禮周二凌晨巴黎舉行，賓施馬憑歐聯、西甲雙冠王成就，以高票數當選，第二、三名係沙迪奧文尼及奇雲迪布尼。
賓施馬一掃老粗型象，以斯文四眼look領獎，佢係史上第5位得獎嘅法國球員，頒奬人係施丹，兩代法國天王，構成圓滿頒獎典禮。
踏入30歲後大爆發，可謂大器晚成，走位、組織及入球能力，忽然進入最高境界。遲來的成熟，令佢適時代替C朗離隊後嘅前線領䄂位置，皇馬球迷，點可以唔愛死賓施馬？
一切看似完美，但過程極艱辛。未進入30歲前，由出道球會里昂，到2009年加盟皇家馬德里，表面少年得志，但從未得到巨星級別看待：雖然皇馬長任正選，但一般看法：咪又係C朗跟班，葡萄牙球王鍾意佢唔貪功，咪畀佢做正選囉！
私人生活更大鑊，上位無耐已爆一大籮醜聞，包括同列貝利同嫖雛妓、涉助犯毒黑幫洗黑錢等，2015年，更捲入以性愛影片勒索法國隊友華布拿案件。控方指賓施馬有收歹徒錢，鼓勵華布拿交巨額贖金，賓施馬堅稱只係居中協調解決事件，並無涉及金錢。
案件擾攘6年，法庭上年裁定賓施馬罪名成立，判12個月緩刑及罰款9萬歐元。個人留下污點，由2015年底起亦被逐出法國國家隊，錯過咗2018年捧世界盃嘅機會。
終成正果，得獎感言：「有一段時間好困難，未能入選法國隊。但我冇放棄，努力練習。我為我嘅旅程自豪，因為好唔容易。年齡只係數字，我依然有團火，我會繼續努力。」
其他奬項，最佳門將係賓施馬隊友高圖爾斯，巴塞隆拿中場加維係最佳新人，女子金球獎得主佩迪拉絲，亦來自巴塞，加埋羅拔利雲度夫斯基獲最佳射手，西甲雙雄可謂壟斷晒頒獎典禮。
