'

【金球奬】情與義值千金!C朗陪跑照去頒奬禮 佢真係好愛賓施馬

性格高傲,但對自己老友,依然有情有義。盛傳C朗會出席今年金球獎頒奬禮,因為要撐老友賓施馬,想見證呢位昔日戰友獲得榮譽嘅一刻。

同美斯主宰球壇多年,C朗曾經係金球奬頒獎禮常客,亦曾5度得奬,但自從2017年封王後,就一直缺席頒獎禮。一般認為,佢係自知得獎無望故拒絕現身支持,因此被批評小器、欠缺大體。

今年30人大候選名單,37歲C朗肯定係陪跑角色,但有傳媒爆料,指C朗將出席頒奬禮,因為佢想親身見證前皇馬隊友兼死黨賓施馬,足球生涯中最光輝嘅時刻。

賓施馬憑上季驕人表現,成為皇馬贏得西甲、歐聯冠軍功臣,唔單止係金球奬頂頭大熱,甚至可以話攞硬!如果得到C朗親身到場祝賀,無疑更有紀念性。

全盛時期嘅BBC堅勁。

C朗効力皇馬8個球季,同賓施馬係長期前鋒拍檔,捧盃無數,4奪歐聯冠軍,合力鑄造足球歷史經典,建立深厚友誼。

賓施馬近年爐火純青,走上球壇巔峰,但早年効力皇馬仍未夠成熟,備受劣評。C朗當時一直給予支持,並多次為老友辯護,反擊外界對賓施馬嘅批評,係夠義氣嘅。

金球獎由《法國足球》雜誌,於1956年開始舉辦,過百名足球記者投票。今屆頒獎禮於香港時間10月18日凌晨喺賓施馬祖家巴黎舉行,主要奬項包括最佳男、女球員,最佳新人及最佳門將。

上屆美斯壓倒羅拔利雲度夫斯基,第7度得到金球獎,極具爭議性。今次佢同聖日耳門隊友尼馬,未有進入30人候選名單。