近期啲波都幾刺激，睇得King Sir相當之過癮。當然啦，如果再中埋波的話就樂趣滿分。今期如常揀3隻整條過關，全部都係意甲賽事，睇吓時運高唔高。
周一00：30開波有維羅納主場對阿特蘭大。現時維羅納踢過兩輪聯賽都未開齋，開鑼日主場面對踢法較為主動嘅拿玻里更以2比5落敗，可見場地對維羅納幫助唔大。阿特蘭大話晒近年都有份打歐洲賽，計級數一定喺主隊之上。上周聯賽仲幾乎搞掂衛冕嘅AC米蘭，今次對住維羅納應難唔到佢哋，先揀「客勝」。
另外，費倫天拿主場對拿玻里，論氣勢確係拿玻里好啲，上輪聯賽就狂勝蒙沙4比0。不過咁，費倫天拿一樣咁弗，由8月中至今連同意甲及歐協聯都未輸過，「紫百合」有主場之利兼受讓平半高水，一於捧「下盤」。
最後萊切主場對安玻里，呢類意大利下游球隊，踢法上有個特色，就係對強隊就縮，對住同級球隊就谷，有時仲谷到義無反顧嗰隻，打落都幾有娛樂性。今次就進取多少，揀個入球大細3.5球「大」，有成2.75倍都幾和味。
